آئی سی سی کا ویمنز ورلڈکپ کے لیے ریکارڈ انعامی رقم کا اعلان

انٹرنیشنل کرکٹ کونسل (آئی سی سی) نے ویمنز ون ڈے ورلڈکپ 2025 کے لیے انعامی رقم میں تاریخ ساز اضافہ کرتے ہوئے اسے 297 فیصد تک بڑھا دیا ہے۔ نئی مجموعی انعامی رقم 13.88 ملین امریکی ڈالر مقرر کی گئی ہے، جو خواتین کرکٹ کی تاریخ میں سب سے بڑی رقم ہے۔

آئی سی سی کے مطابق، رواں سال چیمپئن بننے والی ٹیم کو 4.48 ملین ڈالر دیے جائیں گے، جو 2022 کے ورلڈکپ کے مقابلے میں 239 فیصد زائد ہیں۔ رنر اپ ٹیم کو 2.24 ملین ڈالر، جبکہ سیمی فائنل میں شکست کھانے والی ہر ٹیم کو 1.12 ملین ڈالر ملیں گے۔

تمام شریک ٹیموں کو کم از کم 2 لاکھ 50 ہزار ڈالر دیے جائیں گے، جبکہ گروپ اسٹیج میں ہر فتح پر 34 ہزار 314 ڈالر بطور انعام دیے جائیں گے۔

پانچویں اور چھٹی پوزیشن حاصل کرنے والی ٹیموں کو 7 لاکھ ڈالر جبکہ ساتویں اور آٹھویں نمبر پر آنے والی ٹیموں کو 2 لاکھ 80 ہزار ڈالر کی رقم دی جائے گی۔

واضح رہے کہ آئی سی سی ویمنز ون ڈے ورلڈکپ 30 ستمبر سے بھارت اور سری لنکا میں مشترکہ طور پر منعقد ہوگا۔