بھارتی فوج کے سابق جنرل کا پاکستان کے خلاف آبی دہشت گردی کا انکشاف، ویڈیو منظرِ عام پر

بھارتی فوج کے ریٹائرڈ لیفٹیننٹ جنرل کنول جیت سنگھ ڈھلوں کی ایک ویڈیو منظرِ عام پر آئی ہے جس میں وہ پاکستان کے خلاف پانی کو بطور ہتھیار استعمال کرنے کے منصوبے کا اعتراف کرتے دکھائی دیتے ہیں۔

ویڈیو  سوشل میڈیا پر شیئر کی گئی، جس میں جنرل ڈھلوں واضح طور پر پاکستان کو آبی دہشت گردی کے ذریعے نقصان پہنچانے کی حکمتِ عملی بیان کر رہے ہیں۔

ویڈیو میں سابق بھارتی جنرل کا کہنا ہے کہ"ہمارے پاس پانی روکنے کی جتنی صلاحیت ہے، ہم اسے استعمال کریں گے۔ پھر ایک دن رات کے وقت اچانک سارا پانی پاکستان کی طرف چھوڑ دیا جائے گا۔ پاکستان کے پاس اتنی گنجائش نہیں کہ وہ اس پانی کو روک یا ذخیرہ کر سکے، نتیجتاً وہاں شدید سیلاب آ جائے گا۔ پاکستان اس پانی کا مؤثر استعمال بھی نہیں کر سکے گا۔"

یہ بیان پاکستان کے خلاف بھارتی آبی جارحیت کے عزائم کو بے نقاب کرتا ہے، جس پر ماہرین نے تشویش کا اظہار کرتے ہوئے اسے بین الاقوامی آبی قوانین کی سنگین خلاف ورزی قرار دیا ہے۔

تجزیہ کاروں کا کہنا ہے کہ بھارت کا یہ طرزِ عمل نہ صرف خطے میں کشیدگی کو ہوا دے سکتا ہے بلکہ سندھ طاس معاہدے جیسے بین الاقوامی معاہدوں کی کھلی خلاف ورزی بھی ہے۔