جنوبی افریقہ کی ٹیم 4 سال بعد پاکستان میں ٹیسٹ کھیلے گی،مجوزہ شیڈول سامنے آ گیا

کیپ ٹاؤن:جنوبی افریقہ کی کرکٹ ٹیم چار سال سے زائد عرصے بعد پاکستان میں ٹیسٹ میچز کھیلے گی،اس حوالے سے تمام فارمیٹس کی سیریز کا مجوزہ شیڈول سامنے آگیا۔

مجوزہ شیڈول کے مطابق پاکستان اورجنوبی افریقہ کے مابین پہلا ٹیسٹ 12 سے 16 اکتوبر تک قذافی اسٹیڈیم لاہور میں کھیلا جائے گا،جبکہ دوسرا ٹیسٹ میچ 20 سے 24 اکتوبر تک راولپنڈی کرکٹ اسٹیڈیم میں کھیلا جائے گا۔

اسی طرح راولپنڈی میں ہی 28 اکتوبر کو ون ڈے سیریز کا آغاز ہوگا، دیگر دو میچز  بالترتیب 31 اکتوبر اور دو نومبر کو اقبال اسٹیڈیم فیصل آباد میں ہوں گے۔

شیڈول کی منظوری ملنے پر اس شہر میں طویل عرصے بعد انٹرنیشنل کرکٹ کی واپسی ہوگی۔

ٹی ٹوئنٹی سیریز کا آغاز پانچ نومبر کو ملتان میں ہوگا ، بقیہ دو میچز آٹھ اور نو نومبر کو قذافی اسٹیڈیم لاہور میں کھیلے جائیں گے۔

اس سیریز کے حوالے سے جنوبی افریقی وفد انتظامات کا جائزہ لینے پاکستان آیا ہوا ہے جو آج واپس چلا جائے گا۔

خیال رہے کہ یہ مجوزہ شیڈول ہے تاہم حتمی شیڈول دونوں بورڈز میں بات چیت کے بعد ہی منظورکیا جائے گا،اس حوالے سے تاریخوں اور وینیوز میں ردوبدل بھی ممکن ہے۔

خیال رہے کہ اس سے قبل پروٹیز نے آخری بار جنوری، فروری 2021  میں کوئنٹن ڈی کاک کی زیر قیادت پاکستانی سرزمین پر ٹیسٹ سیریز کھیلی تھی جس میں اسے وائٹ واش کا سامنا کرنا پڑا تھا۔

تاہم ٹی ٹوئنٹی سیریز میں جنوبی افریقہ کو 1-2 سے شکست ہوئی تھی۔