پیوٹن کی کم جونگ ان سے ملاقات، کورین صدرکی کرسی سےڈی این اے کے ثبوت مٹا دیئے گئے

بیجنگ : روسی صدر ولادیمیر پیو ٹن سے شمالی کوریا کے رہنما کم جونگ ان  ملاقات کی جس میں دونوں رہنمائوں نے دو طرفہ تعلقات، تعاون، تجارت اور دفاعی امور پر تبادلہ خیال کیا۔

دونوں رہنمائوں کے درمیان چینی دارالحکومت بیجنگ میں ہونے والی اس ملاقات نے عالمی سیاست میں نئی بحث کو جنم دیا ہے، وہیں اس ملاقات کے بعد پیش آنے والا ایک منفرد واقعہ بھی توجہ کا مرکز بن گیا ہے۔ 

سوشل میڈیا پر وائرل ہونے والی فوٹیج میں دیکھا جا سکتا ہے کہ ملاقات ختم ہونے کے فورا بعد شمالی کوریا کے معاونین نے کم جونگ ان کی کرسی اور ارد گرد کی میز کو بڑی احتیاط سے صاف کیا۔ 

عملے نے کرسی کی پشت ، بازو ارو سائیڈ ٹیبل کو باریک بینی سے رگڑ کر صاف کیا جبکہ رہنما کے استعمال شدہ گلاس کو بھی احتیاط کے ساتھ ٹرے میں رکھ کر اپنے ساتھ لے گئے۔ 

اس حوالے سے روسی صحافی الیگزینڈر یوناشیف نے اپنے یوٹیوب چینل یوناشیو لائیو پر دعویٰ کیا کہ کم جونگ ان کے عملے نے یہ اقدامات اپنے رہنما کے ڈی این اے کے نشانات مٹانے کے لیے کیے۔ انہوں نے بتایا کہ اس باریکی سے کی گئی صفائی نے کئی لوگوں کو حیران کر دیا ہے۔

دلچسپ بات یہ ہے کہ اس غیر معمولی احتیاط کے باوجود ملاقات خوشگوار ماحول میں مکمل ہوئی،الیگزینڈر یوناشیف نے بتایا کہ ملاقات کے بعدبیوٹن اور کم جونگ ان نہ صرف پرجوش انداز میں گفتگو کرتے نظر آئے بلکہ دونوں رہنما ایک ساتھ چائے سے بھی لطف اندوز ہوئے۔