سیالکوٹ: ایف آئی اے کی کارروائی، غیر قانونی طریقے یورپ جانے کی کوشش کرنے والے 12 مسافرگرفتار

سیالکوٹ: وفاقی تحقیقاتی ادارے (ایف آئی اے )کے امیگریشن سیل نے سیالکوٹ ائیر پورٹ پر کارروائی کرتے ہوئے غیر قانونی طریقےسے یورپ جانے کی کوشش کرنے والے 12 مسافروں کوگرفتار کر لیا۔

 ڈائریکٹر ایف آئی اے کے مطابق ایف آئی اے امیگریشن سیل نے سیالکوٹ ائیر پورٹ پر کارروائی کی، جہاں مسافروں کو آف لوڈ کر کے گرفتار کیا گیا،گرفتار افراد کاتعلق گوجرانوالہ سمیت پنجاب کے مختلف شہروں سے ہیں۔

ڈائریکٹر ایف آئی اے نے مزید بتایا کہ گرفتار ملزمان یوگنڈا کے ویزے پر سفر کر رہے تھے اور ان کا منصوبہ تھا کہ یوگنڈا سے لیبیا پہنچ کر وہاں سے یورپ داضل ہوں گے۔

 ترجمان ایف آئی اے کا کہنا ہے کہ گرفتار مسافر گوجرانوالہ ، حافظ آباد، سیالکوٹ اور شیخو پورہ کے رہائشی ہیں جبکہ اوکاڑہ اور پاکپتن سے تعلق رکھنے والے افراد بھی شامل ہیں۔

 ترجمان نے مزید بتایا کہ ابتدائی تحقیقات میں یہ بات سامنے آئی ہے کہ ملزمان انسانی اسمگلنگ میں ملوث ایجنٹوں سے رابطے میں تھے۔

 ایف آئی اے حکام کا کہناہے کہ گرفتار افراد سے مزید تفتیش جاری ہے اور ان کی نشاندہی پر ایجنٹوں کے خلاف بھی کریک ڈائون کیا جائے گا۔