سلیپ پیرا لیسس یعنی نیند کے دوران انسان کا مفلوج ہو جانا ،یہ کیا ہے اور کیوں ہوتا ہے؟

ویب ڈیسک: ماہرین صحت  نے ایک پراسرار اور خوفناک نیند کی کیفیت سلیپ پیرالیسس (Sleep Paralysis)  یا نیند کے دوران مفلوج ہو جانا کی وضاحت کی ہے، جس میں انسان جاگنے کے باوجود نہ بول پاتا ہے، نہ حرکت کر پاتا ہے۔

طبی ماہرین کے مطابق یہ کیفیت زیادہ تر اس وقت پیش آتی ہے جب کوئی شخص نیند میں جا رہا ہو یا نیند سے بیدار ہو رہا ہو۔ دماغ تو ہوش میں آجاتا ہے مگر جسم کے بازو اور ٹانگیں مکمل طور پر ساکت رہتے ہیں۔ ماہرین کے مطابق یہ صورتحال وقتی ہوتی ہے اور کسی بڑی بیماری کی علامت نہیں سمجھی جاتی، لیکن اس کا تجربہ انسان کو خوف میں مبتلا کر دیتا ہے۔

سلیپ پیرالیسس کیسی محسوس ہوتی ہے؟

اس کیفیت کے دوران انسان اپنے اردگرد کے ماحول سے آگاہ ہوتا ہے مگر حرکت یا گفتگو نہیں کر سکتا۔ صرف آنکھیں ہلائی جا سکتی ہیں اور سانس لینا ممکن رہتا ہے۔ بہت سے افراد کو بھوت نما سائے، آوازیں یا غیر حقیقی مناظر نظر آتے ہیں، جس سے یہ کیفیت مزید خوفناک لگتی ہے۔
سلیپ پیرالیسس کب اور کیوں ہوتی ہے؟

سوتے وقت پیش آنے والی کیفیت کو ہائپو ناگوجک پیرالیسس کہا جاتا ہے،جاگتے وقت ہونے والی کیفیت کو ہائپو پومپک پیرالیسس کہا جاتا ہے،یہ کیفیت چند سیکنڈ سے چند منٹ تک رہ سکتی ہے۔ سب سے زیادہ کیسز نوجوانوں اور تیس سال تک کی عمر کے افراد میں دیکھے گئے ہیں۔
سلیپ پیرالیسس کےاسباب کیا ہیں؟

یہ کیفیت اس وقت جنم لیتی ہے جب دماغ نیند کے REMمرحلے میں تو داخل ہو جائے مگر جسم اس کے ساتھ ہم آہنگ نہ ہو سکے۔ 
سلیپ پیرالیسس کی وجوہات:

نیند کی کمی ،زیادہ ذہنی دباؤ،نائٹ شفٹ یا بدلا ہوا سونے کا شیڈول ،نیند کی بیماری "نارکولیپسی"اور 
رکاوٹی نیند کی بیماری (Obstructive Sleep Apnea)شامل ہیں۔ 

عام علامات: 
جسم کا اکڑ جانا اور حرکت نہ کر پانا،بولنے کی کوشش کے باوجود آواز نہ نکلنا،دم گھٹنے یا سینے پر بوجھ کا احساس ،گلا دبنے جیسا دباؤ، خوف اور دہشت یا غیر حقیقی مناظر یا آوازیں (Hallucinations)۔ 

ماہرین کا کہنا ہے کہ اگرچہ یہ کیفیت وقتی اور کبھی کبھار پیش آتی ہے، لیکن بار بار ہونے کی صورت میں نیند کے ماہر ڈاکٹر سے رجوع کرنا ضروری ہے۔ نیند کی کمی اور ذہنی دباؤ اس کے امکانات کو کئی گنا بڑھا دیتے ہیں۔