دریائے چناب کی طغیانی کے باعث ،شیر شاہ بند میں شگاف ڈالنے کا فیصلہ

ملتان: دریائے چناب میں طغیانی کی شدت کے پیش نظر محکمہ انہار نے شیر شاہ بند میں شگاف ڈالنے کا فیصلہ کر لیا ہے تاکہ ممکنہ تباہی کو روکا جا سکے۔

ذرائع محکمہ انہار کے مطابق، شیر شاہ بند کے آس پاس کے علاقوں میں رہائش پذیر افراد اور بند پر موجود افراد کو پیشگی اطلاع دے دی گئی ہے، جبکہ متاثرہ علاقوں کے انخلا کے لیے مساجد اور لاؤڈ اسپیکرز کے ذریعے اعلانات بھی کیے جا رہے ہیں۔

ذرائع کا کہنا ہے کہ دریائے چناب کے بیٹ (درمیانی نشیبی علاقے) پہلے ہی پانی سے لبریز ہو چکے ہیں، اور مزید پانی کے گزرنے کی گنجائش باقی نہیں رہی، جس کے باعث بریچنگ (شگاف ڈالنے) کا یہ اقدام ناگزیر ہو گیا۔

محکمہ انہار کے مطابق، تریموں بیراج سے 5 لاکھ 40 ہزار کیوسک کا بڑا سیلابی ریلا آئندہ دو روز میں ملتان کی حدود میں داخل ہو جائے گا، جس کے نتیجے میں نشیبی علاقوں کو شدید خطرہ لاحق ہے۔

ادھر ڈی جی پی ڈی ایم اے (پنجاب) عرفان کاٹھیا نے کہا ہے کہ بریچنگ کا فیصلہ ٹیکنیکل کمیٹی کی سفارش پر کیا جاتا ہے تاکہ پانی کو کنٹرول طریقے سے مخصوص علاقوں کی طرف موڑا جا سکے اور بڑے پیمانے پر نقصان سے بچا جا سکے۔

انہوں نے مزید کہا کہ پنجاب کے مختلف شہروں — خصوصاً ملتان، لاہور اور فیصل آباد — میں طوفانی بارشوں کے باعث ریسکیو اور ریلیف سرگرمیوں میں مشکلات کا سامنا ہے، جب کہ گجرات میں شہری علاقوں کو اربن فلڈنگ کا سامنا کرنا پڑا ہے۔

ریسکیو 1122، سول ڈیفنس اور ضلعی انتظامیہ کو ہائی الرٹ کر دیا گیا ہے، جبکہ شہریوں سے اپیل کی گئی ہے کہ وہ انتظامیہ سے تعاون کرتے ہوئے بروقت انخلا کو یقینی بنائیں۔