ٹرمپ کو بڑا جھٹکا: امریکی عدالت نے ہتکِ عزت کیس میں 8 کروڑ 33 لاکھ ڈالر جرمانہ برقرار رکھا

نیویارک: امریکی اپیل کورٹ نے سابق صدر ڈونلڈ ٹرمپ کے خلاف مصنفہ ای۔ جین کیرول کی جانب سے دائر ہتک عزت کے مقدمے میں عائد کیے گئے 83.3 ملین ڈالر (8 کروڑ 33 لاکھ) جرمانے کو برقرار رکھتے ہوئے ان کی اپیل مسترد کر دی ہے۔

عالمی خبر رساں ادارے اے ایف پی کے مطابق، عدالت نے اس فیصلے کو "غیر معمولی اور سنگین حالات" کے تناظر میں مکمل طور پر درست اور مناسب قرار دیا ہے۔

کیس کا پس منظر

مصنفہ اور صحافی ای۔ جین کیرول نے نومبر 2019 میں سابق صدر پر جنسی زیادتی اور ہتک عزت کا مقدمہ دائر کیا تھا۔ ان کا مؤقف تھا کہ 1990 کی دہائی کے وسط میں نیویارک کے معروف برگڈورف گڈمین ڈیپارٹمنٹ اسٹور کے ڈریسنگ روم میں ٹرمپ نے ان کے ساتھ ریپ کیا تھا، اور جب انہوں نے ان الزامات کو 2019 میں عوامی سطح پر لایا، تو ٹرمپ نے ان کا مذاق اُڑایا اور کہا کہ "وہ میری ٹائپ کی نہیں ہیں"۔

کیرول کے مطابق، ٹرمپ کے ان بیانات سے ان کی صحافتی ساکھ متاثر ہوئی اور انہیں عوامی سطح پر تضحیک کا سامنا کرنا پڑا۔

جنوری 2024 میں نیویارک کی ایک فیڈرل جیوری نے ٹرمپ کو ہتک عزت کا مرتکب قرار دیتے ہوئے انہیں 83.3 ملین ڈالر جرمانے کا حکم دیا تھا ۔ 

 جس میں 6 کروڑ 50 لاکھ ڈالر بطور تعزیری ہرجانہ ،73 لاکھ ڈالر ازالۂ نقصان کے طور پر ،1 کروڑ 10 لاکھ ڈالر کیرول کی شہرت کی بحالی کے لیے آن لائن مہم کے اخراجات شامل تھے۔

اس رقم کا تعین اس بنیاد پر کیا گیا کہ جیوری نے یہ پایا کہ ٹرمپ نے بدنیتی کے ساتھ بار بار کیرول کو بدنام کیا۔

ٹرمپ کا مؤقف :

77 سالہ ٹرمپ نے الزامات کو جھوٹ قرار دیتے ہوئے دعویٰ کیا کہ وہ ای۔ جین کیرول کو جانتے تک نہیں، اور یہ سب کچھ انہوں نے اپنی کتاب کی فروخت بڑھانے کے لیے گھڑا ہے۔