رحیم یارخان: سیلاب متاثرین کی کشتی الٹ گئی، 3 افراد جاں بحق، 2 لاپتہ

 جلالپور پیروالا: پنجاب کے ضلع رحیم یارخان کے علاقے موضع نور والا میں سیلاب متاثرین کو لے جانے والی کشتی الٹنے سے 3 افراد جاں بحق ہو گئے، جبکہ 2 افراد تاحال لاپتہ ہیں۔ کشتی میں 20 سے زائد افراد سوار تھے، جن میں سے بیشتر کو بچا لیا گیا۔

ضلعی انتظامیہ کے مطابق، جاں بحق افراد میں دو خواتین اور ایک مرد شامل ہیں، جن کی لاشیں آرمی کے غوطہ خوروں نے نکال لی ہیں۔ حادثے کے وقت کشتی میں سوار افراد میں خواتین اور بچے بھی شامل تھے۔

انتظامیہ کا کہنا ہے کہ لاپتہ دو افراد کی تلاش جاری ہے جبکہ متاثرہ خاندانوں کو فوری امداد فراہم کی جا رہی ہے۔

ادھر، ملتان کی تحصیل جلالپور پیروالا کے علاقے چک 86 ایم میں بھی سیلابی ریلے کے باعث چار افراد ڈوب گئے۔ مقامی افراد نے اپنی مدد آپ کے تحت دو لاشیں نکال لیں، تاہم اہل علاقہ نے شکایت کی کہ ریسکیو ٹیمیں اور کشتی تاخیر سے پہنچیں جس سے امدادی کارروائی میں مشکلات پیش آئیں۔

مقامی افراد نے مطالبہ کیا ہے کہ ریسکیو سسٹم کو بہتر بنایا جائے اور سیلاب متاثرہ علاقوں میں فوری رسپانس ٹیمیں تعینات کی جائیں تاکہ ایسے واقعات سے بچا جا سکے۔