قطر میں اسرائیلی حملہ: حماس قیادت کی شہادت پر دوحہ کا شدید ردعمل

قطری سرزمین پر اسرائیلی فضائی حملے میں فلسطینی مزاحمتی تنظیم حماس کی اعلیٰ قیادت کو نشانہ بنانے پر قطر نے شدید ردعمل ظاہر کیا ہے۔

اطلاعات کے مطابق، اسرائیل نے دارالحکومت دوحہ میں ایک فضائی کارروائی کے دوران حماس کے سینئر ترین رہنما خلیل الحیہ کو شہید کر دیا۔ اسرائیلی فوج نے اپنے بیان میں تصدیق کی ہے کہ دوحہ میں حماس کی اعلیٰ قیادت کو نشانہ بنایا گیا۔

حماس ذرائع کے مطابق، حملے کے وقت تنظیم کے کئی رہنما ایک اہم اجلاس میں شریک تھے، جس میں امریکی صدر کی جانب سے غزہ میں جنگ بندی کی تجویز پر غور کیا جا رہا تھا۔

اسرائیلی کارروائی کے بعد قطر کی وزارت خارجہ کی جانب سے سخت ردعمل سامنے آیا ہے۔ وزارت خارجہ کے ترجمان ڈاکٹر ماجد بن محمد الانصاری نے حملے کی سخت الفاظ میں مذمت کرتے ہوئے کہا ہے کہ رہائشی عمارتوں اور حماس قیادت کو نشانہ بنانا بین الاقوامی قوانین کی کھلی خلاف ورزی ہے۔

ترجمان کا کہنا تھا کہ یہ مجرمانہ حملہ قطر کے شہریوں اور یہاں مقیم افراد کی سلامتی کے لیے سنگین خطرہ ہے۔ ان کے مطابق، سیکیورٹی فورسز، سول ڈیفنس اور دیگر متعلقہ ادارے فوری طور پر کارروائی میں مصروف ہو گئے ہیں تاکہ رہائشی علاقوں کی حفاظت یقینی بنائی جا سکے۔

وزارت خارجہ نے واضح کیا ہے کہ قطر نہ صرف اس غیر ذمہ دارانہ اسرائیلی اقدام کی شدید مذمت کرتا ہے، بلکہ وہ اپنی خودمختاری اور سلامتی کو نشانہ بنانے والی کسی بھی کارروائی کو قبول نہیں کرے گا۔

بیان میں مزید کہا گیا ہے کہ واقعے کی اعلیٰ سطح پر تحقیقات جاری ہیں اور جیسے ہی مزید تفصیلات دستیاب ہوں گی، انہیں منظرِ عام پر لایا جائے گا۔