9 مئی واقعات: شاہ محمود قریشی ایک اور مقدمے میں بری، یاسمین راشد و دیگر کو 10،10 سال قید

لاہور کی انسداد دہشت گردی عدالت نے 9 مئی کے ایک اور مقدمے کا فیصلہ سناتے ہوئے پاکستان تحریک انصاف (پی ٹی آئی) کے سینئر رہنما شاہ محمود قریشی کو بری کر دیا، جبکہ پارٹی کی دیگر اہم شخصیات کو قید کی سزائیں سنائی گئی ہیں۔

یہ مقدمہ مال روڈ پر سپریم کورٹ کے جج کے اسکواڈ کی گاڑی کو نذرِ آتش کرنے سے متعلق تھا۔ عدالت نے اس کیس میں ڈاکٹر یاسمین راشد، سینیئر رہنما اعجاز چوہدری، میاں محمود الرشید اور سابق گورنر پنجاب عمر سرفراز چیمہ کو 10،10 سال قید کی سزا سنائی۔

قبل ازیں، انسداد دہشت گردی عدالت نے 9 مئی کے جلاؤ گھیراؤ کے شیرپاؤ پل کیس میں بھی شاہ محمود قریشی کو بری کر دیا تھا، جبکہ ڈاکٹر یاسمین راشد، میاں محمود الرشید اور دیگر ملزمان کو اسی نوعیت کی 10،10 سال قید کی سزا دی گئی تھی۔