ملک بھر میں بجلی کی قیمت میں کمی، صارفین کو 24 ارب روپے کا ریلیف

کراچی سمیت پورے ملک میں بجلی کی قیمت میں ماہانہ ایڈجسٹمنٹ کے تحت فی یونٹ 1.79 روپے کی کمی کر دی گئی ہے۔

نیشنل الیکٹرک پاور ریگولیٹری اتھارٹی (نیپرا) نے اس کمی کا نوٹی فکیشن جاری کر دیا ہے، جس کے مطابق یہ کمی جولائی 2025 کی ماہانہ ایڈجسٹمنٹ میں شامل ہے۔ اس کا اطلاق کے الیکٹرک اور دیگر سرکاری ڈسکوز کے صارفین پر ہوگا۔

نوٹی فکیشن کے مطابق صارفین کو اس ریلیف کا فائدہ ستمبر کے بجلی کے بلوں میں ملے گا، جبکہ سی پی پی اے نے جولائی کی ایڈجسٹمنٹ میں 1.69 روپے فی یونٹ کمی کی سفارش کی تھی۔

یہ کمی ملک بھر کے بجلی صارفین کو تقریباً ساڑھے 24 ارب روپے کا ریلیف فراہم کرے گی۔

واضح رہے کہ پاور ڈویژن نے یکساں ٹیرف پالیسی گائیڈ لائنز ای سی سی کے ذریعے نیپرا میں جمع کروائی تھیں، جس کے تحت ماہانہ ایڈجسٹمنٹ کا اطلاق کے الیکٹرک پر بھی کیا جائے گا۔

اقتصادی رابطہ کمیٹی (ای سی سی) اور وفاقی کابینہ نے ملک بھر کے لیے یکساں فیول چارجز ایڈجسٹمنٹ کو نافذ کرنے کی منظوری دی ہے۔ ای سی سی نے 19 اگست کو پاور ڈویژن کی سمری منظور کی تھی، جس کے بعد ملک بھر میں ماہانہ ایڈجسٹمنٹ یکساں طریقے سے نافذ کی جائے گی۔