سپریم کورٹ کا وزارت داخلہ کو خط: ریٹائرڈ ججز اور بیواؤں کو سکیورٹی فراہم کرنے کی ہدایت

اسلام آباد: سپریم کورٹ کے رجسٹرار نے چیف جسٹس پاکستان کی منظوری سے وزارت داخلہ کو ایک باضابطہ خط ارسال کیا ہے، جس میں ریٹائرڈ ججز اور انتقال کر جانے والے ججز کی بیواؤں کو سکیورٹی فراہم کرنے کی ہدایت کی گئی ہے۔

خط میں کہا گیا ہے کہ ملک میں موجودہ سکیورٹی صورتحال کے تناظر میں ہر ریٹائرڈ جج کو 3 پولیس اہلکاروں پر مشتمل سکیورٹی ٹیم مہیا کی جائے۔

اس کے ساتھ ساتھ، جو ججز وفات پا چکے ہیں، ان کی بیواؤں کو بھی 3 پولیس اہلکاروں کی سکیورٹی فراہم کی جائے تاکہ ان کی حفاظت یقینی بنائی جا سکے۔

رجسٹرار کی جانب سے یہ بھی واضح کیا گیا ہے کہ تعینات سکیورٹی اہلکار متعلقہ ڈسٹرکٹ پولیس آفیسر (ڈی پی او) کے ماتحت ہوں گے، اور ان کی نگرانی بھی وہی کریں گے۔

وزارت داخلہ کو ہدایت کی گئی ہے کہ اس فیصلے پر فوری عملدرآمد کے لیے تمام متعلقہ سکیورٹی اداروں کو احکامات جاری کیے جائیں تاکہ کسی قسم کے خطرے یا خدشے کا بروقت سدباب کیا جا سکے۔

یہ مراسلہ تمام صوبوں کے چیف سیکرٹریز اور انسپکٹر جنرلز (آئی جیز) کو بھی بھیجا گیا ہے تاکہ ملک بھر میں اس فیصلے پر موثر عمل درآمد یقینی بنایا جا سکے۔