نیپال: کامیاب پرتشدد مظاہروں کے بعد پارلیمنٹ تحلیل،سابق چیف جسٹس عبوری وزیر اعظم مقرر

کھٹمنڈو: نیپال میں کامیاب پرتشددمظاہروں کے بعد پارلیمنٹ کو تحلیل کر کے نئے انتخابات کی تاریخ کا اعلان کر دیا گیا۔

غیر ملکی میڈیا کے مطابق اس حوالے سے نیپال میں ملک کی پہلی خاتون چیف جسٹس 71 سالہ سشیلہ کارکی کو عبوری وزیراعظم مقرر کر دیا گیا، جنہوں نے ایوان صدر میں حلف اٹھا لیا۔

کرکی کی تعیناتی صدر کی جانب سے اس کے بعد عمل میں آئی جب صدر، فوج کے سربراہ اشوک راج سگدل اور مظاہرین کے درمیان مذاکرات ہوئے، جنہوں نے نیپال کی حالیہ بدترین ہنگاموں کی قیادت کی تھی۔

نیپال کے صدر دفتر سے جاری بیان میں کہا گیا ہے کہ پارلیمنٹ تحلیل کر دی گئی ہے۔ اور ملک میں نئے عام انتخابات 5 مارچ 2026 کو ہوں گے۔

خیال رہے کہ سشیلہ کرکی نیپال کی سپریم کورٹ کی واحد خاتون چیف جسٹس رہ چکی ہیں اور بدعنوانی کے خلاف سخت موقف کے لیے مشہور ہیں۔

 منصب پر رہتے ہوئے انہوں نے کرپشن پر زیرو ٹالرنس پالیسی اپنائی تھی، ایک سال سے بھی کم عرصے میں ان کے خلاف مواخذے کی تجویز آئی تھی مگر عوامی دباؤ کی وجہ سے اسے مسترد کرنا پڑا۔ اس کے بعد انہوں نے چیف جسٹس کے عہدے سے استعفیٰ دے دیا تھا۔

واضح رہے کہ کرپشن اور سوشل میڈیا پابندی کے خلاف شروع ہونے والے عوامی مظاہروں کے نتیجے میں وزیر اعظم پہلے ہی مستعفی ہوچکے ہیں۔ اور فوج نے دارالحکومت کھٹمنڈو کا کنٹرول سنبھالا ہوا ہے جبکہ عوام کے پرتشدد مظاہروں میں سابق وزرا کے گھر اور اہم عمارتوں کو نذر آتش کیا گیا۔