نیگلیریا وائرس کا قہر جاری، کراچی میں ایک اور نوجوان زندگی کی بازی ہار گیا

کراچی: شہر قائد میں نیگلیریا وائرس نے ایک اور قیمتی جان لے لی، رواں سال وائرس سے اموات کی تعداد پانچ ہو گئی۔

محکمہ صحت سندھ کے مطابق 29 سالہ نوجوان، جو ضلع وسطی کا رہائشی تھا، نیگلیریا وائرس سے متاثر ہونے کے بعد انتقال کر گیا۔ مریض میں 7 ستمبر سے بیماری کی علامات ظاہر ہونا شروع ہوئیں، جبکہ 11 ستمبر کو اسے ایک نجی اسپتال میں داخل کرایا گیا۔

محکمہ صحت نے بتایا کہ مریض کی وفات کے بعد 12 ستمبر کو نیگلیریا وائرس کی تصدیق ہوئی۔

حکام کے مطابق 2025 میں نیگلیریا سے پہلا جانی نقصان 23 فروری کو ہوا، جب گلشن اقبال کی 36 سالہ خاتون ایک نجی اسپتال میں اس مہلک انفیکشن سے انتقال کر گئی تھیں۔

یاد رہے کہ نیگلیریا فاؤلری ایک نایاب مگر مہلک دماغی انفیکشن ہے، جو ناک کے ذریعے دماغ میں داخل ہو کر دماغی سوزش اور ہلاکت کا سبب بنتا ہے۔ اس وائرس کی عمومی وجہ غیر محفوظ پانی کا استعمال یا وضو کے دوران آلودہ پانی کا ناک میں جانا ہوسکتا ہے۔