قاہرہ کے میوزیم سے 3 ہزار سال پرانا سونے کا کڑا غائب، تحقیقات شروع

قاہرہ: مصر کی وزارتِ آثارِ قدیمہ نے تصدیق کی ہے کہ قاہرہ کے مشہور ایجپشن میوزیم کی ایک لیبارٹری سے 3 ہزار سال قدیم سونے کا کڑا لاپتا ہو گیا ہے۔

وزارت کے بیان کے مطابق، یہ تاریخی کڑا مصر کی اکیسویں سلطنت (1070 تا 945 قبل مسیح) کے فرعون آمنموپ کے دورِ حکومت سے تعلق رکھتا ہے۔ تاہم، یہ واضح نہیں ہو سکا کہ یہ کڑا آخری بار کب دیکھا گیا تھا۔

مقامی میڈیا رپورٹس کے مطابق، حالیہ دنوں میں کی گئی انوینٹری چیکنگ کے دوران اس قیمتی نوادرات کی گمشدگی کا انکشاف ہوا، تاہم اس کی سرکاری سطح پر تصدیق تاحال نہیں ہو سکی۔

وزارت نے واقعے کی انکوائری کا آغاز کر دیا ہے، اور ملک بھر کے ہوائی اڈوں، بندرگاہوں اور زمینی سرحدی چیک پوسٹس پر آثارِ قدیمہ کی متعلقہ یونٹس کو ہائی الرٹ کر دیا گیا ہے تاکہ کڑے کی ممکنہ اسمگلنگ کو روکا جا سکے۔

قاہرہ کے تحریر اسکوائر میں واقع ایجپشن میوزیم میں ایک لاکھ 70 ہزار سے زائد قیمتی نوادرات موجود ہیں، جن میں فرعون آمنموپ کا مشہور سنہری ماسک بھی شامل ہے۔

یہ واقعہ ایسے وقت میں پیش آیا ہے جب مصر میں یکم نومبر کو طویل عرصے سے زیرِ تکمیل "گریٹ ایجپشن میوزیم" کے افتتاح کی تیاریاں عروج پر ہیں۔