متنازع میچ ریفری اینڈی پائی کرافٹ نے پاکستانی کپتان اور منیجر سے معافی مانگ لی

ایشیا کپ کے دوران پیدا ہونے والے تنازع پر انٹرنیشنل کرکٹ کونسل (آئی سی سی) کے متنازع میچ ریفری اینڈی پائی کرافٹ کی جانب سے پاکستانی ٹیم کے منیجر اور کپتان سے معذرت کی ویڈیو جاری کر دی گئی ہے۔

پاکستان کرکٹ بورڈ (پی سی بی) کے مطابق، اینڈی پائی کرافٹ نے انڈیا کے خلاف 14 ستمبر کو کھیلے گئے میچ سے قبل پیدا ہونے والی غلط فہمی پر معذرت کی ہے۔ انہوں نے اس واقعے کو "مس کمیونیکیشن" کا نتیجہ قرار دیا۔

خیال رہے کہ میچ سے قبل اینڈی پائی کرافٹ نے دونوں ٹیموں کے کپتانوں کو آپس میں مصافحہ کرنے سے روک دیا تھا، جس پر پی سی بی نے شدید ردعمل ظاہر کیا تھا اور اسے "غیر ضروری اور غیر پیشہ ورانہ اقدام" قرار دیا تھا۔

آئی سی سی نے بھی 14 ستمبر کے واقعے کی انکوائری کے لیے آمادگی ظاہر کر دی ہے، اور اس حوالے سے ممکنہ کوڈ آف کنڈکٹ کی خلاف ورزی پر باضابطہ جانچ کی جائے گی۔

ادھر ذرائع کا کہنا ہے کہ میچ ریفری کی تبدیلی کے معاملے پر جاری ڈیڈ لاک میں بھی مثبت پیش رفت ہوئی ہے۔ پاکستان کرکٹ بورڈ کی جانب سے گرین سگنل ملنے کے بعد قومی ٹیم یو اے ای کے خلاف میچ کھیلنے کے لیے تیار ہے۔