صائم ایوب کی فارم بدستور خراب، ایشیا کپ میں ’صفر‘ کی ہیٹ ٹرک مکمل

پاکستانی اوپننگ بیٹر صائم ایوب مسلسل آؤٹ آف فارم دکھائی دے رہے ہیں، ایشیا کپ کے دوران وہ تین مسلسل اننگز میں بغیر کوئی رن بنائے پویلین لوٹ گئے۔

بائیں ہاتھ سے بیٹنگ کرنے والے صائم ایوب نے ایشیا کپ میں 'صفر' پر آؤٹ ہونے کی ہیٹ ٹرک مکمل کی۔ دبئی میں متحدہ عرب امارات کے خلاف کھیلے گئے میچ میں وہ صرف دو گیندوں کا سامنا کر کے کھاتہ کھولے بغیر آؤٹ ہو گئے۔

اس سے قبل 14 ستمبر کو بھارت کے خلاف اہم میچ میں صائم ایوب پہلی ہی گیند پر وکٹ گنوا بیٹھے تھے، جب کہ 12 ستمبر کو عمان کے خلاف بھی وہ صرف ایک گیند کھیل کر صفر پر آؤٹ ہو گئے تھے۔

اعداد و شمار کے مطابق، صائم ایوب نے گزشتہ 9 ٹی ٹوئنٹی انٹرنیشنل میچز میں 5 مرتبہ صفر پر آؤٹ ہونے کا "ریکارڈ" بنایا ہے، اور اس عرصے میں وہ صرف ایک نصف سنچری بنانے میں کامیاب ہو سکے ہیں۔

ان کی مسلسل ناکامیوں نے پاکستان کی ٹاپ آرڈر بیٹنگ لائن پر سوالیہ نشان لگا دیے ہیں، اور کرکٹ ماہرین ان کی فارم پر شدید تشویش کا اظہار کر رہے ہیں۔