کیچ میں سیکیورٹی فورسز کے قافلے پر خودکش حملہ، 8 اہلکار زخمی

بلوچستان کے ضلع کیچ کے علاقے دشت کھڈان کے قریب کینچتی کراس پر جمعرات کی دوپہر سیکیورٹی فورسز کے قافلے کو خودکش حملے کا نشانہ بنایا گیا، جس کے نتیجے میں کم از کم 8 اہلکار زخمی ہو گئے۔

پولیس ذرائع کے مطابق، فرنٹیئر کور (ایف سی) کا قافلہ گوادر سے تربت کی جانب رواں دواں تھا، جس میں 8 سے 10 کوسٹرز اور اسکواڈ کی گاڑیاں شامل تھیں۔ اسی دوران مبینہ طور پر بارود سے بھری زمباد گاڑی قافلے سے ٹکرا گئی، جس کے نتیجے میں شدید دھماکہ ہوا۔

واقعے میں قافلے کی دو گاڑیاں مکمل طور پر تباہ ہو گئیں، جبکہ دھماکے سے قریبی علاقوں میں بھی لرزش محسوس کی گئی۔

پولیس کا کہنا ہے کہ ابتدائی تحقیقات کے مطابق یہ خودکش حملہ تھا، تاہم حتمی تصدیق بم ڈسپوزل یونٹ (BDU) کی رپورٹ آنے کے بعد کی جائے گی۔

زخمی اہلکاروں کو ہیلی کاپٹر کے ذریعے فوری طور پر تربت منتقل کر دیا گیا ہے، جہاں متعدد اہلکاروں کی حالت تشویشناک بتائی جا رہی ہے، جس کے باعث ہلاکتوں کا خدشہ بھی ظاہر کیا جا رہا ہے۔