سعودی عرب سے دفاعی تعاون نیا نہیں، بھارت کی پریشانی فطری ہے: خواجہ آصف

وزیر دفاع خواجہ آصف نے کہا ہے کہ پاکستان اور سعودی عرب کے درمیان دفاعی تعاون کوئی نئی بات نہیں، بلکہ یہ کئی دہائیوں پر محیط شراکت داری کا تسلسل ہے۔ ان کا کہنا ہے کہ دفاعی معاہدے پر بھارت کی پریشانی فطری ہے، تاہم بھارت کا چیخنا پاکستان کے لیے کوئی مسئلہ نہیں۔

سعودی عرب کے ساتھ دفاعی تعاون گزشتہ 40 سے 50 سال سے جاری ہے۔ بعض اوقات یہ تعاون بڑھ جاتا ہے اور بعض اوقات معمول پر آ جاتا ہے، لیکن اس کا بنیادی ڈھانچہ ہمیشہ سے موجود رہا ہے۔"

انہوں نے کہا کہ یہ معاہدہ دفاعی نوعیت کا ہے، نہ کہ جارحانہ، اور اس کا مقصد دونوں ممالک کو تکنیکی، تربیتی اور اسٹریٹجک سطح پر قریب لانا ہے۔

خواجہ آصف نے اس تاثر کو مسترد کیا کہ معاہدہ کسی خاص ملک کے خلاف ہے۔ ان کا کہنا تھا:

"ہم خود جارحیت کا شکار رہے ہیں، خصوصاً بھارت کی جانب سے۔ یہ معاہدہ ہماری دفاعی خودمختاری کو مضبوط بنانے کے لیے ہے، نہ کہ کسی پر حملہ کرنے کے لیے۔"

انہوں نے واضح کیا کہ اس معاہدے کے تحت اگر کسی ایک ملک پر حملہ ہوتا ہے تو اسے دونوں ممالک پر حملہ تصور کیا جائے گا اور ایک دوسرے کی مدد کی جائے گی۔

وزیر دفاع کا کہنا تھا کہ اس معاہدے سے بھارت کو تکلیف ہونا قدرتی بات ہے، لیکن ہمیں اس کی پروا نہیں۔

"بھارت کا چیخنا کوئی نیا یا سنگین مسئلہ نہیں۔ ہم تو برصغیر میں امن چاہتے ہیں لیکن اگر کوئی ہم پر حملہ کرے گا تو دفاع ہمارا حق ہے۔"

خواجہ آصف نے مزید کہا کہ پاکستانی افواج پہلے سے سعودی عرب میں تعینات ہیں، اور یہ معاہدہ صرف اس تعاون کو باضابطہ شکل دیتا ہے۔

انہوں نے کہا کہ "اس معاہدے سے کسی کو خوفزدہ ہونے کی ضرورت نہیں۔ دیگر ممالک بھی اس تعاون میں شامل ہونے کی خواہش رکھتے ہیں۔"