بلوچستان :مغوی اسسٹنٹ کمشنر زیارت بیٹے سمیت اغوا کاروں کے ہاتھوں قتل

زیارت:بلوچستان کے ضلع زیارت کے سیاحتی مقام زیزری سے 42 روز قبل اغوا ہونے والے اسسٹنٹ کمشنر (اے سی) افضل باقی اور ان کے بیٹے کو اغوا کاروں نے قتل کردیا ہے۔ 

چند روز قبل مغوی باپ بیٹے کی ویڈیو بھی سوشل میڈیا پر وائرل ہوئی تھی جس میں وہ حکومت سے اغوا کاروں کے مطالبات تسیلم کرنے کی اپیل کررہے تھے۔
لیویزحکام کے مطابق ہرنائی ضلعی انتظامیہ کو اطلاع ملی تھی کہ ہرنائی کے علاقے زرد آلو کے قریب 2 لاشیں پڑی ہوئی ہیں، لیویز کی بھاری نفری نے موقع پر پہنچ کر لاشوں کو تحویل میں لے کر اسپتال پہنچایا جہاں لاشوں کی شناخت اغوا ہونے والے اسسٹنٹ کمشنر زیارت افضل باقی اور ان کے بیٹے مستنصر بلال سے ہوئی۔

اغوا کاروں نے دونوں مغویوں کو تشدد کرنے کے بعد سروں پر گولیاں مار کر قتل کیا جس کے بعد لاشیں زرد آلو کے علاقے میں پھینک کر فرار ہو گئے جب کہ اسپتال میں ضروری کارروائی کے بعد میتیں ورثاء کے حوالے کر دی گئیں۔

دوسری جانب وفاقی  وزیرداخلہ محسن نقوی نے مغوی اسٹنٹ کمشنر زیارت  محمد  افضل اور بیٹے کو شہید  کرنے کے واقعہ کی مذمت کرتے ہوئے انہیں شہید قرار دیتے ہوئے خراج عقیدت پیش کیا۔ 

وزیرداخلہ محسن  نقوی  نے شہید اسٹنٹ  کمشنر محمد  افضل  کے خاندان سے  دلی  ہمدردی  اور  تعزیت  کا  اظہار کرتے ہوئے کہ کہ محمد  افضل  نے فرض  کی  ادائیگی  کے  دوران  شہادت کا بلند رتبہ پایا۔ 

انہوں نے مزید کہا کہ اسٹنٹ  کمشنر  زیارت  محمد  افضل  فرض شناس ۔ محنتی اور  قابل  افسر تھے اور وہ ہمارے دلوں میں ہمیشہ زندہ رہیں گے۔
وزیرداخلہ نے کہا کہ اسٹنٹ کمشنر محمد افضل اور انکے  بیٹے  کو شہید کرنے  والے  درندے عبرتناک انجام  سے بچ نہیں پائیں  گے۔

خیال رہے کہ 10 اگست کو اسسٹنٹ کمشنر زیارت افضل باقی اپنی فیملی اور محافظوں کے ہمراہ زیارت کے سیاحتی مقام زیزری میں پکنک منا رہے تھے کہ اسی دوران قریبی پہاڑ سے ایک درجن سے زائد مُسلح ملزمان نے انہیں گھیرے میں لے کر محافظوں سے اسلحہ چھین کر ان کی گاڑی کو بھی نذر آتش کر دیا تھا۔