ڈبلیو ایچ او کی دوران حمل پیراسیٹامول کا استعمال محفوظ قرار دے کر ٹرمپ کے دعوے کی تردید

عالمی ادارہ صحت (ڈبلیو ایچ او) اور یورپی یونین نے حمل کے دوران پیراسیٹامول کے استعمال کو محفوظ قرار دیا ہے اور اس حوالے سے امریکا کے صدر ڈونلڈ ٹرمپ کی اس وارننگ سے اختلاف کیا ہے جس میں انہوں نے اس عام دردکش دوا کو آٹزم سے جوڑا تھا۔

غیر ملکی خبر رساں ادارے کی رپورٹ کے مطابق ڈبلیو ایچ او نے کہا کہ اس تعلق کے شواہد غیر مستقل ہیں اور نتیجہ اخذ کرنے میں احتیاط کی ضرورت ہے۔

واضح رہے کہ ٹرمپ نے آٹزم کو بچپن میں ویکسین کے استعمال اور حاملہ خواتین کے ٹائلینول (پیراسیٹامول) کھانے سے منسلک کیا تھا۔

یورپی میڈیسنز ایجنسی (ای ایم اے) کے مطابق کوئی نیا ثبوت موجود نہیں جس کی بنیاد پر یورپی خطے میں حمل کے دوران پیراسیٹامول کے استعمال سے متعلق موجودہ سفارشات میں تبدیلی کی ضرورت ہو۔

ای ایم اے کے مطابق دستیاب شواہد نے حمل کے دوران پیراسیٹامول کے استعمال اور آٹزم کے درمیان کوئی تعلق نہیں پایا، پیراسیٹامول حمل کے دوران ضرورت پڑنے پر کم سے کم مؤثر خوراک اور کم از کم مدت کے لیے استعمال کی جا سکتی ہے۔ برطانیہ کے صحت کے نگران ادارے نے بھی پہلے کہا تھا کہ اس کا استعمال محفوظ ہے۔