سلووینیا کا اسرائیلی وزیرِاعظم نیتن یاہو پر سفری پابندی کا اعلان

یورپ کے ملک سلووینیا نے اسرائیل کے وزیرِاعظم بنیامین نیتن یاہو پر سفری پابندی عائد کرنے کا اعلان کر دیا ہے۔

بین الاقوامی میڈیا رپورٹس کے مطابق، سلووینیا نے گزشتہ برس باضابطہ طور پر فلسطین کو ایک خودمختار ریاست کے طور پر تسلیم کیا تھا، جبکہ رواں سال جولائی میں اسرائیلی کابینہ کے دو دائیں بازو کے وزرا پر بھی سفری پابندیاں لگائی گئیں تھیں۔

سلووینیا کی وزارتِ خارجہ کی اسٹیٹ سیکرٹری نیوا گراشچ نے اس فیصلے کی وضاحت کرتے ہوئے کہا کہ"یہ اقدام سلووینیا کی بین الاقوامی قانون، انسانی حقوق کے تحفظ اور اصولی و مستقل خارجہ پالیسی کے عزم کی تصدیق ہے۔"

خیال رہے کہ اگست میں سلووینیا نے اسرائیل کو اسلحے کی فروخت پر پابندی لگائی تھی، اور ساتھ ہی اسرائیلی قبضے میں موجود فلسطینی علاقوں میں تیار کردہ مصنوعات کی درآمد پر بھی پابندی عائد کی گئی تھی۔

نیوا گراشچ کے مطابق، بنیامین نیتن یاہو پر غزہ میں جنگی جرائم کے الزامات کے باعث یہ اقدام اٹھایا گیا ہے، کیونکہ وہ بین الاقوامی عدالتِ انصاف میں زیرِ تفتیش ہیں۔

انہوں نے مزید کہا کہ "اس فیصلے سے اسرائیل کو یہ پیغام دینا مقصود ہے کہ سلووینیا، بین الاقوامی عدالتوں کے فیصلوں اور انسانی قوانین کی مکمل پاسداری کی توقع رکھتا ہے۔"