سیلاب زدگان کو 10 لاکھ تک امداد دی جائے گی ، مریم نواز

وزیراعلیٰ پنجاب مریم نواز نے کہا ہے کہ جن لوگوں کو سیلاب میں لاکھوں کا نقصان ہوا، ان کے لیے بے نظیر انکم سپورٹ پروگرام (BISP) کے 10 ہزار روپے کوئی حیثیت نہیں رکھتے۔ انہوں نے پیپلز پارٹی پر تنقید کرتے ہوئے کہا کہ افسوس ہے کہ انہوں نے پنجاب میں سیلاب کے موقع پر بھی سیاست کی۔

مریم نواز لیکن ان علاقوں کو ان کے حقوق کبھی نہیں دیے گئے۔ انہوں نے کہا "ساؤتھ پنجاب کی لکیر میرے دماغ میں نہیں ہے، جو اس علاقے سے تھے، وہ بھی اقتدار میں آئے مگر کچھ نہ کر سکے۔ یہاں اگر کسی نے کام کیا ہے تو وہ نواز شریف نے کیا ہے۔"

وزیراعلیٰ نے اعلان کیا کہ وہ ایک ماہ کے اندر جنوبی پنجاب میں چیف منسٹر سیکرٹریٹ قائم کریں گی۔ انہوں نے کہا کہ وہ تمام پنجاب کی وزیر اعلیٰ ہیں اور جیسے ایک ماں اپنے بچوں میں فرق نہیں کرتی، ویسے ہی وہ پنجاب کے مختلف علاقوں میں تفریق نہیں کریں گی۔

سیلاب متاثرین کی امداد کے حوالے سے مریم نواز کا کہنا تھا "جس کا گھر تباہ ہوا، فصلیں برباد ہو گئیں، مویشی مر گئے — وہ 10 ہزار روپے سے کیا کرے گا؟ میں چاہتی ہوں کہ ایسے متاثرین کو 10 لاکھ روپے تک کی امداد دی جائے۔"

انہوں نے کہا کہ وہ بین الاقوامی امداد کے لیے ہاتھ نہیں پھیلائیں گی کیونکہ وہ نواز شریف کی بیٹی ہیں "میں وہ نہیں جو دنیا کے آگے جھولی پھیلاؤں۔ جس کا گھر گرا، میں اس کے لیے نیا گھر بنوانا چاہتی ہوں۔ جس کی فصل تباہ ہوئی، میں اس کا نقصان پورا کرنا چاہتی ہوں۔"