سابق فرانسیسی صدر کو مجرمانہ سازش پر 5 سال قید، قذافی فنڈنگ کیس میں اہم فیصلہ

فرانس کے سابق صدر نکولس سرکوزی کو لیبیا کے مرحوم رہنما معمر قذافی سے مبینہ طور پر لاکھوں یورو غیر قانونی طور پر حاصل کرنے کے کیس میں پانچ سال قید کی سزا سنا دی گئی ہے، جن میں سے دو سال معطل ہوں گے۔

یہ تاریخی فیصلہ پیرس کی فوجداری عدالت نے سنایا، جہاں سرکوزی کو مجرمانہ سازش میں ملوث پایا گیا، جبکہ انہیں غیر قانونی انتخابی فنڈنگ اور بالواسطہ کرپشن کے الزامات سے بری کر دیا گیا۔

بی بی سی کی رپورٹ کے مطابق، سرکوزی نے فیصلے کے بعد فوری طور پر اپیل کا اعلان کیا، لیکن قانونی ماہرین کا کہنا ہے کہ اس کے باوجود انہیں قید کی سزا کا سامنا کرنا پڑے گا۔
70 سالہ سابق صدر نے عدالت کے باہر اپنے بیان میں کہا "یہ فیصلہ قانون کی حکمرانی اور عدالتی نظام پر عوام کے اعتماد کے لیے شدید خطرناک ہے۔"

عدالت نے انہیں ایک لاکھ یورو جرمانہ ادا کرنے کا حکم بھی دیا، اور کہا کہ ان کے قریبی ساتھیوں نے قذافی حکومت سے رابطے قائم کیے تاکہ 2007 کی انتخابی مہم کے لیے مالی تعاون حاصل کیا جا سکے۔ تاہم، عدالت نے تسلیم کیا کہ براہِ راست غیر قانونی فنڈز لینے کے شواہد ناکافی تھے۔