روزانہ دہی کھانے کی عادت طویل اور صحت مند زندگی کا راز ہو سکتی ہے

اگر آپ روزانہ دہی کھانے کے عادی ہیں تو یہ عادت نہ صرف صحت کے لیے مفید ہو سکتی ہے بلکہ لمبی عمر کے لیے بھی فائدہ مند ثابت ہو سکتی ہے۔
یہ بات ایک حالیہ تحقیق میں سامنے آئی ہے جو دنیا کی معمر ترین خاتون سمجھی جانے والی ماریا برینیاس موریرا کی زندگی پر کی گئی۔

ماریا برینیاس موریرا کا انتقال اگست 2024 میں 117 سال کی عمر میں ہوا تھا اور وفات سے قبل وہ دنیا کی معمر ترین شخصیت کے طور پر جانی جاتی تھیں۔

اسپین کی بارسلونا یونیورسٹی اور دیگر تعلیمی اداروں سے وابستہ محققین نے ان کی زندگی کے آخری ایام میں ان کی خوراک، جسمانی نمونوں اور طرزِ زندگی کا جائزہ لیا تاکہ ان کی طویل العمری کی وجوہات کو سمجھا جا سکے۔

تحقیقی ٹیم نے ماریا کے خون، پیشاب اور لعاب دہن کے نمونے اس وقت حاصل کیے جب ان کی عمر 116 برس تھی، اور ان کا موازنہ ان کی 80 سالہ بیٹی سے کیا گیا۔

نتائج سے معلوم ہوا کہ ماریا برینیاس دن میں تین مرتبہ دہی کھاتی تھیں اور اسے اپنی صحت کا لازمی جزو قرار دیتی تھیں۔
تحقیق کے مطابق، جینیاتی عوامل کے ساتھ ساتھ دہی کھانے کی عادت نے بھی ان کی صحت مند اور طویل زندگی میں نمایاں کردار ادا کیا۔

خود ماریا برینیاس کا کہنا تھا کہ وہ اپنی لمبی عمر کو اچھی قسمت اور مضبوط جینز کا نتیجہ مانتی تھیں، اور محققین نے بھی ان کے اس مؤقف کی تائید کی۔

ماریا 4 مارچ 1907 کو امریکا میں پیدا ہوئیں، لیکن 8 سال کی عمر میں اپنے والدین کے ساتھ اسپین منتقل ہو گئی تھیں۔
ان کی زندگی کا بیشتر حصہ وہاں ہی گزرا، جہاں وہ ایک پرسکون اور متوازن طرزِ زندگی کی علمبردار رہیں۔