بہتر ازدواجی زندگی اور بچوں کے لیے اداکاری چھوڑی ، فرح حسین

نامور ٹی وی میزبان و اداکارہ فرح حسین نے انکشاف کیا ہے کہ انہوں نے شادی کے بعد ازدواجی زندگی کو متوازن رکھنے اور بچوں کی بہتر تربیت کے لیے اداکاری سے دستبرداری اختیار کی۔

انہوں نے یہ گفتگو حال ہی میں نجی ٹی وی کے مزاحیہ پروگرام میں شرکت کے دوران کی، جہاں انہوں نے اپنی پیشہ ورانہ اور ذاتی زندگی کے کئی پہلوؤں پر کھل کر بات کی۔

فرح حسین کا کہنا تھا کہ انہوں نے شوبز کا آغاز بطور اداکارہ کیا، مگر جلد ہی پاکستان ٹیلی وژن (پی ٹی وی) پر مارننگ شو کی میزبانی شروع کر دی، اس وقت مارننگ شوز کا رجحان نجی چینلز پر عام نہیں تھا۔

انہوں نے بتایا کہ ابتدائی طور پر انہیں کم عمری کے باعث متعدد بار میزبانی کے لیے مسترد کیا گیا، لیکن بالآخر انہیں موقع ملا اور ان کا شو ناظرین میں بے حد مقبول ہوا۔

"زندگی ایک تحفہ ہے، ہر لمحہ قیمتی ہے"

ایک سوال کے جواب میں انہوں نے کہا کہ "زندگی رب کی طرف سے عطا کردہ سب سے خوبصورت تحفہ ہے۔ ہر دن، ہر لمحہ اور ہر سانس کو قدر کے ساتھ گزارنا چاہیے۔"

فرح حسین نے بتایا کہ وہ فطرتاً سنجیدہ مزاج کی حامل ہیں اور یہی خوبی انہیں دوسروں کے احساسات اور دکھ درد کو سمجھنے کے قابل بناتی ہے۔ ان کے مطابق"جس دن انسان دوسروں کے دکھ سے بے نیاز ہو جائے، اس دن وہ انسان نہیں رہتا۔"