آزاد کشمیر میں انتخابی مہم کا آج آخری روز

تفصیلات کے مطابق  انتخابی مہم آج رات بارہ بجے کے بعد روک دی جائے گی اور پولنگ اتوار 25 جولائی کو ہوگی۔ وزیر اعظم عمران خان آج تراڑ کھل اور کوٹلی میں جبکہ چیئرمین پیپلز پارٹی بلاول بھٹو زرداری باغ اور مظفر آباد میں جبکہ مسلم کانفرنس کے سردار عتیق دھیر کوٹ میں انتخابی جلسوں سے خطاب کریں گے۔آزادکشمیر کے 33 حلقوں میں  602 امیدوار اپنی قسمت آزمائی کریں گے جبکہ  ا ن 33 حلقوں میں 12بڑے مقابلے متوقع ہیں۔ سابق وزرائے اعظم، سیاسی جماعتوں کے سربراہان اور وزارت عظمیٰ کی دوڑ میں شامل امیدواروں کے درمیان  سخت مقابلوں کا امکان ہے۔

آزاد کشمیر میں 32 لاکھ 20 ہزار 546 رائے دہندگان 25 جولائی کو پانچ سال کے لئے اپنے نمائندوں کا انتخاب کریں گے۔ ان انتخابات میں پیپلزپارٹی، پی ٹی آئی اور مسلم لیگ نواز کے درمیان کا نٹے کا مقابلہ ہو گا جبکہ مرکز میں پی ٹی آئی کی حکومت کی وجہ سے ان کے امیدوراروں کو دیگر جماعتوں کے امیدواروں پر برتری حاصل ہے ۔

دوسری جانب الیکشن کمیشن کی درخواست پر آئین کے آرٹیکل 245 کے تحت آزاد کشمیر میں پاک فوج طلب کرلی گئی ہے۔آئی ایس پی آر کے مطابق فوجی جوان 22 سے 26 جولائی کے دوران ’کوئیک رسپانس فورس‘ کے طور پر تعینات ہوں گے۔

الیکشن کے خوشگوار انعقاد کیلئے آزاد کشمیر پولیس تعینات کی جائے گی جس کی مدد و تعاون کیلئے دیگر صوبوں کی پولیس اور رینجرز سمیت قانون نافذ کرنے والے اداروں کی خدمات حاصل کی جائیں گی۔