ہم نے دفاعی صلاحیت دکھا دی، اب معاشی استحکام کی باری ہے: نائب وزیراعظم

نائب وزیرِاعظم اور وزیر خارجہ اسحٰق ڈار نے کہا ہے کہ پاکستان اور سعودی عرب کے درمیان حالیہ دفاعی معاہدے پر کسی بھی ملک نے کوئی اعتراض نہیں اٹھایا، بلکہ دیگر کئی ممالک بھی پاکستان کے ساتھ اسی نوعیت کے معاہدے کرنے کے خواہاں ہیں۔

لندن میں پاکستانی ہائی کمیشن کے باہر صحافیوں سے گفتگو کرتے ہوئے اسحٰق ڈار نے کہا کہ یہ معاہدہ یک دم نہیں ہوا بلکہ اس پر گزشتہ ڈیڑھ سال سے سنجیدہ مشاورت اور تیاری جاری تھی۔ انہوں نے کہا کہ یہ معاہدہ دونوں ملکوں کے مفاد میں ہے اور اس پر کسی کو تحفظات نہیں ہونے چاہئیں۔

اسحٰق ڈار کا کہنا تھا کہ پاکستان کا اصل مقام بحال کرنا ہماری ترجیح ہے۔ دفاعی اعتبار سے ہم نے دنیا کو اپنی صلاحیت دکھا دی ہے، اب ہماری کوشش ہے کہ ملک کو اقتصادی طور پر بھی مستحکم کیا جائے۔

انہوں نے کہا کہ پاکستان کو تمام ممالک کے ساتھ برابری اور باہمی عزت کے اصول پر تعلقات رکھنے چاہئیں، چاہے وہ چھوٹے ملک ہوں یا بڑے، سب کی عزت یکساں اہمیت رکھتی ہے۔

چند روز قبل، وزیر خارجہ نے لندن ہی میں گفتگو کرتے ہوئے واضح کیا تھا کہ سعودی عرب کے ساتھ دفاعی تعلقات کوئی نیا معاملہ نہیں بلکہ یہ ایک تاریخی تسلسل کا حصہ ہیں، اور حالیہ معاہدہ کئی ماہ کی سنجیدہ بات چیت کے بعد طے پایا ہے۔

قبل ازیں، وزیر دفاع خواجہ آصف بھی کہہ چکے ہیں کہ پاکستان اور سعودی عرب کے اس دفاعی معاہدے میں دیگر عرب ممالک کی شمولیت کے دروازے بند نہیں کیے گئے۔

یاد رہے کہ 18 ستمبر کو وزیراعظم شہباز شریف کے دورۂ سعودی عرب کے دوران پاکستان اور سعودی عرب کے درمیان ایک "اسٹریٹجک باہمی دفاعی معاہدہ" پر دستخط کیے گئے تھے۔

مشترکہ اعلامیے کے مطابق، سعودی ولی عہد محمد بن سلمان اور وزیراعظم شہباز شریف کی موجودگی میں طے پانے والے اس معاہدے کے تحت، اگر کسی ایک ملک کے خلاف جارحیت کی جاتی ہے تو اسے دونوں ممالک کے خلاف جارحیت تصور کیا جائے گا۔

معاہدہ دونوں ممالک کے دفاعی روابط کو مزید مضبوط بنانے اور خطے میں امن، استحکام اور سلامتی کے فروغ کے عزم کا اظہار کرتا ہے۔