عوام کی خدمت کے لیے کسی اجازت کی ضرورت نہیں، بھیک مانگنے کا کلچر اب ختم ہونا چاہیے ، مریم نواز

وزیراعلیٰ پنجاب مریم نواز نے کہا ہے کہ انہیں عوامی خدمت کے لیے کسی کی منظوری درکار نہیں اور قومی ترقی کا ہر مسئلہ محض بینظیر انکم سپورٹ پروگرام سے حل نہیں کیا جا سکتا۔ انہوں نے واضح کیا کہ ملک میں بھیک مانگنے کا کلچر ختم ہونا چاہیے۔

فیصل آباد میں ایک تقریب سے خطاب کرتے ہوئے مریم نواز نے کہا کہ اگر پنجاب اپنے آئینی حق کے لیے آواز بلند کرے، تو اس پر اعتراض کیوں ہوتا ہے؟ انہوں نے سوال اٹھایا کہ جب پنجاب اپنی نہریں نکالنے یا وسائل کے درست استعمال کی کوشش کرتا ہے تو دیگر حلقوں کو اس پر کیوں تکلیف ہوتی ہے؟

وزیراعلیٰ پنجاب نے کہا کہ نہری منصوبوں پر اعتراضات کے باوجود پنجاب خاموش رہا، حالانکہ صوبہ صرف اپنے حصے کے پانی کا استعمال چاہتا تھا تاکہ چولستان جیسے علاقے سرسبز بنائے جا سکیں۔

انہوں نے مزید کہا کہ حالیہ سیلاب متاثرین کی امداد پر بھی اعتراضات اٹھائے جا رہے ہیں، جبکہ پنجاب اپنے عوام کو ان کا جائز حق دینے کے لیے کسی کی اجازت کا محتاج نہیں۔

مریم نواز نے کہا کہ اگر سندھ میں ترقیاتی منصوبے ہوتے ہیں تو انہیں خوشی ہوتی ہے، مگر سوال یہ ہے کہ "کچھ ہوا بھی ہے یا نہیں؟"۔ انہوں نے مزید کہا کہ پنجاب نے میٹرو، اورنج لائن، موٹروے اور دیگر انفرا اسٹرکچر منصوبے مکمل کیے، جن پر بلاوجہ تنقید کی جاتی ہے۔

وزیراعلیٰ نے واضح کیا کہ پنجاب نے کبھی کسی اور صوبے کے معاملات میں مداخلت نہیں کی اور نہ ہی کسی سے اس کے حق سے دستبردار ہونے کا مطالبہ کیا، لہٰذا پنجاب کو بھی غیر ضروری مشورے نہ دیے جائیں۔

اپنی تقریر میں مریم نواز نے سیاسی مخالفین کو تنقید کا نشانہ بناتے ہوئے کہا کہ جو لوگ آج ایک دوسرے پر الزامات لگا رہے ہیں، عوام نے ان کے رویے دیکھ لیے ہیں۔ "میری ذات پر تنقید برداشت ہو سکتی ہے، لیکن پنجاب کی توہین ہرگز قبول نہیں،" انہوں نے کہا۔

آخر میں انہوں نے نیشنل فنانس کمیشن (این ایف سی) ایوارڈ کا حوالہ دیتے ہوئے کہا کہ تمام صوبوں کو یکساں فنڈز ملتے ہیں، لیکن سوال یہ ہے کہ وہ رقم کہاں خرچ ہو رہی ہے؟ "ہر مسئلے کا حل صرف بی آئی ایس پی نہیں ہو سکتا،" انہوں نے دوٹوک انداز میں کہا۔