صمود فلوٹیلا پر اسرائیلی حملہ اور کارکنوں کی گرفتاری عالمی قوانین کی کھلی خلاف ورزی ہے،دفتر خارجہ

اسلام آباد: پاکستان نے اسرائیل کی جانب سے گلوبل صمود فلوٹیلا پر حملہ اورروکنے کی شدید مذمت کرتے ہوئے کہا ہے کہ فلوٹیلا پر سوار کارکنان کی غیر قانونی گرفتاری بین الاقوامی قانون کی صریح خلاف ورزی ہے۔

تفصیلات کے مطابق وزارت خارجہ کی جانب سےجاری بیان میں کہا گیا ہے کہ فلوٹیلا میں 40 سے زائد سول جہاز اور 500 بین الاقوامی کارکن شامل تھے، کارکنان غزہ کے محصور عوام کے لیے انسانی امداد لے جا رہے تھے، اسرائیل کی کارروائی بے گناہ شہریوں کی زندگیاں خطرے میں ڈالنے کے مترادف ہے۔

بیان ترجمان دفتر خارجہ نے مزید کہاکہ اسرائیل کی مسلسل جارحیت اور غیر قانونی ناکہ بندی سے 20 لاکھ فلسطینی متاثر ہیں، انسانی امداد روکنا اسرائیل کی بطور قابض قوت ذمہ داریوں کی سنگین خلاف ورزی ہے۔

ترجمان نے مزید کہا کہ انسانی امداد کو روکنا چوتھے جنیوا کنونشن کی سنگین خلاف ورزی ہے ، فلسطینیوں تک بلا رکاوٹ انسانی امداد کی فراہمی یقینی بنائی جائے،ترجمان نے کہا کہ اسرائیل کو بین الاقوامی قوانین کی خلاف ورزی پر جواب دہ بنایا جائے۔

ترجمان دفتر خارجہ کے مطابق پاکستان فوری اور غیر مشروط جنگ بندی کا مطالبہ کرتا ہے اور غزہ کی غیر قانونی ناکہ بندی کے خاتمے پر زور دیتا ہے، فلوٹیلا پر سوار تمام کارکنان و رضا کاروں کو فوری رہا کیا جائے۔

ترجمان دفتر خارجہ نے کہا کہ اسرائیل کو بار بار کی خلاف ورزیوں پر جوابدہ ٹھہرایا جانا چاہئے، پاکستان فلسطینی عوام سے غیر متزلزل حمایت اور یکجہتی کا اعادہ کرتا ہے اور 1967 سے پہلے کی سرحدوں پر مبنی آزاد و خودمختار فلسطینی ریاست کے قیام پر زور دیتا ہے۔
دفتر خارجہ پاکستان نے کہا ہے کہ القدس الشریف کو فلسطین کا دارالحکومت ہونا چاہئے۔

خیال رہے کہ اسرائیلی فورسز نے امداد لے جانے والی 40 سے زائد کشتیوں پر مشتمل فلوٹیلا کو گھیرے میں لیکر کارکنوں کو حراست میں لیا ، فلوٹیلا پر پاکستان کے سابق سینیٹر مشتاق احمد بھی سوار ہیں۔