اے ٹی ایف انڈر 12 انٹرکانٹینینٹل ٹینس چیمپئن شپ: پاکستان نے کولمبیا کو شکست دے دی

اے ٹی ایف انڈر 12 انٹرکانٹینینٹل ٹینس چیمپئن شپ میں پاکستان نے پانچویں سے آٹھویں پوزیشن کے پلے آف مرحلے میں کولمبیا کو شکست دے دی۔

سنسنی خیز مقابلے کے بعد پاکستان نے جنوبی امریکا کی ٹیم کولمبیا کو 1-2 سے مات دی۔

پہلے سنگلز مقابلے میں کولمبیا کے سمیعل گارشیا نے راشد علی کو 2-6، 7-6، اور 4-10 سے ہرا دیا۔ تاہم، دوسرے سنگلز میچ میں محمد شایان نے پاؤلو ایگڈیلو کو شکست دے کر مقابلہ برابر کر دیا۔ شایان کی جیت کا اسکور 2-6، 7-5، اور 8-10 رہا۔

فیصلہ کن ڈبلز میچ میں شایان اور راشد پر مشتمل پاکستانی جوڑی نے عمدہ کارکردگی دکھاتے ہوئے 4-6 اور 4-6 سے کامیابی حاصل کی۔

پانچویں پوزیشن کے حصول کے لیے پاکستان کل چائنیز تائپے کے خلاف میدان میں اُترے گا۔ یاد رہے کہ پاکستان کو گزشتہ روز آسٹریلیا کے ہاتھوں کوارٹر فائنل میں 0-2 سے شکست ہوئی تھی۔