ناشتہ دیر سے کرنا: صحت اور عمر پر منفی اثرات مرتب ہوسکتے ہیں، تحقیق

ستمبر 2025 میں سامنے آنے والی ایک تحقیق میں یہ بات سامنے آئی ہے کہ صبح دیر سے ناشتہ کرنے کی عادت نہ صرف صحت کو متاثر کرتی ہے بلکہ زندگی کی مدت کو بھی مختصر کر سکتی ہے۔

اگرچہ جلد ناشتہ کرنے سے فوری طور پر کوئی واضح فائدہ محسوس نہیں ہوتا، تاہم ایک مخصوص وقت پر مستقل مزاجی کے ساتھ ناشتہ کرنا جسمانی وزن اور بلڈ شوگر کو متوازن رکھنے میں مددگار ثابت ہوتا ہے۔

ناشتے کا وقت اہم کیوں ہے؟

اس مطالعے میں برطانیہ سے تعلق رکھنے والے تقریباً 3 ہزار افراد کو شامل کیا گیا۔ نتائج سے معلوم ہوا کہ ناشتہ تاخیر سے کرنے سے قبل از وقت موت کا خطرہ بڑھ سکتا ہے۔

تحقیق کے مطابق، ناشتے میں ہر ایک گھنٹے کی تاخیر کے ساتھ قبل از وقت موت کا خطرہ 8 سے 11 فیصد تک بڑھ جاتا ہے۔

جینیاتی عوامل، ناشتہ تیار کرنے میں سستی، نیند کی خرابیاں اور مختلف بیماریوں کو ناشتے کے وقت میں تبدیلی کی ممکنہ وجوہات قرار دیا گیا۔

محققین کا کہنا ہے کہ اگرچہ مزید تحقیق کی ضرورت ہے، لیکن ناشتے کا وقت بزرگ افراد میں صحت کے خطرات کی نشاندہی کے لیے ایک اشارہ فراہم کر سکتا ہے۔

کیا جلد ناشتہ کرنا واقعی بہتر ہے؟

اس تحقیق میں مثالی ناشتے کے وقت کا تعین تو نہیں کیا گیا، لیکن اکثر ماہرین صحت کا مشورہ ہے کہ جاگنے کے بعد ایک سے دو گھنٹوں کے اندر ناشتہ کر لینا مفید ہے تاکہ جسم کو دن بھر کے لیے درکار توانائی میسر آ سکے۔

اکیڈمی آف نیوٹریشن اینڈ ڈائیٹٹکس کی ترجمان ڈاکٹر اینجل پلانیلز کے مطابق، صبح جلد ناشتہ کرنے سے میٹابولزم بہتر ہوتا ہے، بلڈ شوگر مستحکم رہتی ہے، اور حیاتیاتی گھڑی کے افعال درست طور پر کام کرتے ہیں۔

مزید یہ کہ جلد ناشتہ کرنے سے جی ایل پی-1 نامی ہارمون کی سرگرمی بڑھتی ہے، جو کھانے کے بعد جسم میں خارج ہوتا ہے اور بھوک کو کنٹرول کرنے، نظامِ ہضم کی بہتری اور بلڈ شوگر کو متوازن رکھنے میں مدد دیتا ہے۔