وزیر خارجہ اسحاق ڈار کا مشتاق احمد سے رابطہ، 9 اکتوبر کو وطن واپسی متوقع

اسلام آباد: وزیر خارجہ و نائب وزیراعظم اسحاق ڈار نے ملائیشیا کے دورے سے واپسی پر سابق سینیٹر مشتاق احمد سے ٹیلی فون پر رابطہ کیا۔

ترجمان دفترِخارجہ کے مطابق گفتگو پاکستان کے سفیرعمان کے ذریعے کرائی گئی، مشتاق احمد خیریت سے ہیں اور ان کا حوصلہ بلند ہے،انہوں نے کہا کہ سابق سینیٹر9 اکتوبرکوپاکستان واپس پہنچیں گے جبکہ دفترِخارجہ نے ان کی وطن واپسی کے تمام انتظامات مکمل کرلیے ہیں۔

ترجمان دفتر خارجہ کے مطابق اسحاق ڈار نے جماعت اسلامی کے رہنما کے جذبے اور فلسطینی عوام سے اظہارِ یکجہتی پران کے عزم کو خراجِ تحسین پیش کیا، فلوٹیلا میں انکی شمولیت جرات، استقامت اورانسانی ہمدردی کی روشن مثال ہے۔

اسحاق ڈار کا مزید کہنا تھا کہ مشتاق احمد کا کردار فلسطینی عوام کے لیے عالمی سطح پر پاکستانی مؤقف کی ترجمانی کرتا ہے، جو قابلِ فخرامر ہے۔

قبل ازیں وزیر خارجہ اسحاق ڈار نے تصدیق کرتے ہوئے کہا کہ مشتاق احمد خان کی رہائی پاکستان کی مؤثر سفارتی کاوشوں کا ثمر ہے، متعلقہ ادارے سابق سینیٹر کی واپسی کے انتظامات میں مصروف ہیں۔

 سابق سینیٹر نے اس موقع پر پاکستانی دفترِخارجہ کی بروقت کاوشوں اورمکمل تعاون پرشکریہ ادا کیا اورکہا کہ وہ وطن واپسی کے بعد فلسطین سے متعلق اپنے تجربات قوم کے ساتھ شیئرکرینگے۔