پہچان پروگرام کے تحت 200 سے زائد خواجہ سراؤں کو ٹول کٹس کی تقسیم

لاہور میں پنجاب سکلز ڈویلپمنٹ فنڈ (PSDF) نے اپنے "پی ایس ڈی ایف – پہچان" پروگرام کے تحت 200 سے زائد خواجہ سرا افراد کو پیشہ ورانہ ٹول کٹس فراہم کیں تاکہ وہ مختلف شعبہ جات جیسے بیوٹی اینڈ گرومنگ، کلنری آرٹس، پرفارمنگ آرٹس، آئی ٹی، دستکاری اور ڈیجیٹل فری لانسنگ میں باعزت روزگار کا آغاز کر سکیں۔

یہ پروگرام وزیر اعلیٰ پنجاب مریم نواز شریف کے ہنر مند پنجاب ویژن کا حصہ ہے، جس کا مقصد صنفی تفریق سے بالاتر ہو کر تمام افراد کو ہنر سیکھنے اور آمدنی بڑھانے کے مساوی مواقع فراہم کرنا ہے۔

تقریب میں خطاب کرتے ہوئے پی ایس ڈی ایف کے سی ای او احمد خان نے کہا کہ خواجہ سرا کمیونٹی کو ٹول کٹس کی فراہمی ایک تاریخی قدم ہے، جو نہ صرف انہیں باعزت روزگار کی راہ پر گامزن کرے گا بلکہ انہیں معاشی طور پر خودمختار بھی بنائے گا۔

ہر ٹول کٹ کو متعلقہ شعبے کی ضروریات کے مطابق تیار کیا گیا ہے تاکہ خواجہ سرا افراد فوری طور پر فری لانسنگ، چھوٹے کاروبار یا نوکری کے ذریعے اپنی معاشی سرگرمیوں کا آغاز کر سکیں۔

پروگرام کی اہمیت پر روشنی ڈالتے ہوئے وزیر اعلیٰ ٹاسک فورس برائے ہنرمندی کے چیئرمین عدنان افضل چٹھہ نے کہا کہ "پہچان" پروگرام نہ صرف حکومت پنجاب کے وژن کی ترجمانی کرتا ہے بلکہ ایک جامع اور بااختیار معاشرہ تشکیل دینے کی عملی مثال بھی ہے۔ پاکستان میں 95 فیصد خواجہ سرا رسمی روزگار سے محروم ہیں، ایسے میں یہ اقدام ایک مثبت تبدیلی کی بنیاد بن سکتا ہے۔