دو سال تک دھوکا دیا گیا، اب انصاف چاہتی ہوں: نمرہ مہرا

معروف گلوکارہ نمرہ مہرا نے الزام عائد کیا ہے کہ میوزک لیبل کمپنی ’بیانڈ ریکارڈز‘ نے انہیں دو سال تک دھوکا دیا اور ان کے گانوں کے تمام حقوق بغیر اجازت ایک دوسری کمپنی کو منتقل کر دیے۔

انسٹاگرام پر جاری کی گئی ایک مختصر ویڈیو پیغام میں نمرہ مہرا نے دعویٰ کیا کہ مذکورہ میوزک کمپنی نے نہ صرف انہیں کسی بھی گانے کا معاوضہ ادا نہیں کیا بلکہ ان کے گانوں کے رائٹس بھی غیر قانونی طور پر فروخت کر دیے گئے۔

انہوں نے کمپنی کے چیف ایگزیکٹو افسر (سی ای او) جبران خان پر بھی شدید الزامات لگاتے ہوئے کہا کہ وہ دو سال تک جھوٹے وعدوں اور تسلیوں میں رکھی گئیں۔

نمرہ مہرا نے کہا کہ انہوں نے اپنی میوزک ویڈیوز خود پروڈیوس کیں، انٹرویوز کا انتظام بھی خود کیا اور تیار شدہ مواد کمپنی کے حوالے کیا، مگر کمپنی نے اس کا مکمل کریڈٹ خود سمیٹا۔

گلوکارہ کے مطابق انہیں بار بار یقین دہانی کروائی گئی کہ انہیں جلد معاہدہ دیا جائے گا اور مالی معاملات طے کر لیے جائیں گے، لیکن یہ سب صرف وعدے ہی رہے۔ جب بھی انہوں نے اپنی ادائیگی یا حقوق کے بارے میں استفسار کیا، بات کو ٹال دیا جاتا رہا۔

نمرہ نے مزید انکشاف کیا کہ حال ہی میں انہیں پتہ چلا کہ کمپنی نے ان کے تمام گانوں کے حقوق بغیر اجازت ایک اور ادارے کو بیچ دیے، جس سے انہیں سخت دھچکا پہنچا۔

انہوں نے اعلان کیا کہ وہ قانونی چارہ جوئی کا آغاز کر چکی ہیں، اور ان کے وکیل نے کمپنی کو باضابطہ طور پر قانونی نوٹس بھی بھجوا دیا ہے۔

نمرہ مہرا نے شوبز شخصیات اور عوام سے اپیل کی کہ وہ اس ناانصافی کے خلاف ان کا ساتھ دیں اور ان کے حق میں آواز بلند کریں۔

تاحال بیانڈ ریکارڈز یا اس کے سی ای او کی جانب سے ان الزامات پر کوئی ردعمل سامنے نہیں آیا، تاہم نمرہ مہرا کی ویڈیو پر متعدد شخصیات نے اظہار یکجہتی کرتے ہوئے انہیں بہادر قرار دیا ہے۔