مذہبی سیاسی جماعت کے احتجاج کا معاملہ،جڑواں شہروں میں راستے، میٹرو اور انٹرنیٹ دوسرے روز بھی بند

اسلام آباد:مذہبی سیاسی جماعت کی جانب سے احتجاجی کال کے باعث جڑواں شہروں دوسرے روز بھی بند معمولات زندگی بری طرح متاثر ہیں،جبکہ انٹرنیٹ، میٹرو، الیکٹرک بسز اور دیگر راستوںکی بندش کے باعث تجارتی سرگرمیاں بھی معطل ہیں۔

تفصیلات کے مطابق راولپنڈی ایکسپریس وے، فیض آباد اور آئی جی پی روڈ مکمل طور پر بند ہے، راولپنڈی اور اسلام آباد کو ملانے والا فیض آباد انٹرچینج بھی سیل ہے جبکہ کھنہ پل، کری روڈ اور ڈھوک کالا خان کے راستے بھی تا حال سیل ہیں۔

اسی طرح وارث خان، کمیٹی چوک، سکستھ روڈ، شمس آباد اور ایران روڈ بھی سیل ہیں،جبکہ راول روڈ، شاہین چوک، صدر اور پرانے ائیرپورٹ سے آنے والے راستے بھی مکمل بند ہیںجبکہ ائیرپورٹ جانے والے راستوں کی بندش کے باعث پروازوں میں تاخیر کی اطلاعات ہیں۔

ممکنہ احتجاج کے پیش نظر جڑواں شہروں میں میٹرو بس اور انٹرنیٹ سروس دوسرے روز بھی معطل ہے اور فیض آباد کے مقام پر پولیس کی بھارتی نفری تعینات ہے، فیض آباد میں تمام ہوٹلز کو بھی سیل کر دیا گیا ہے، جبکہ راستوں کی بندش کے باعث تعلیمی ادارے بھی بند ہیں۔

اسی طرح وفاقی دارالحکومت اسلام آباد آنے والے بیشتر راستے کنٹینرز لگا کر بند رکھے گئے ہیں، ریڈ زون کو مکمل طور پر سیل کر دیا گیا ہے، صرف مارگلہ روڈ کھلا ہے۔

راولپنڈی انتظامیہ نے شہر میں ہیوی ٹریفک کے داخلے پر مکمل پابندی عائد کر رکھی ہے جبکہ ائیرپورٹ جانے والے راستوں کو بھی کنٹینر لگا کر سیل کر دیا گیا جس کے باعث پروازوں میں تاخیر ہو رہی ہے۔

دوسری جانب لاہور کے علاقے شاہدرہ میں مذہبی جماعت کے کارکنوں اور پولیس کے درمیان جھڑپوں کی اطلاعات بھی موصول ہوئی ہیں۔ پولیس نے لاٹھی چارج اور آنسو گیس کا استعمال کیا، جبکہ مظاہرین کی جانب سے پتھراؤ کیا گیا جس کے نتیجے میں کئی افراد زخمی ہوئے۔