وزیر اعلیٰ علی امین گنڈاپور کا استعفیٰ گورنر کے پی فیصل کریم کو موصول 

پشاور:وزیر اعلی خیبر پختونخوا علی امین گنڈ اپورکا استعفیٰ گورنر فیصل کریم کنڈی کو موصول ہونے کی تصدیق ہو گئی۔

تفصیلات کے مطابق گورنر خیبر پختونخوا فیصل کریم کنڈی کو آج علی امین گنڈاپور کا استعفیٰ موصول ہوگیا جسے وزیراعلیٰ کے معاون خصوصی برائے انسداد بدعنوانی بریگیڈیئر (ر)مصدق عباسی گورنر ہاؤس لے کرگئے۔

مصدق عباسی نے علی امین گنڈاپور کا استعفیٰ گورنر ہاؤس کے کیئرٹیکر کے حوالے کیا اور کیئر ٹیکر نے استعفیٰ وصول کرکے رسید بھی دی جب کہ استعفے کی وصولی کی رسید پر ڈھائی بجے دوپہر کا وقت درج ہے۔

دوسری جانب گورنر کے پی فیصل کریم کنڈی نے بتایا کہ آج ڈھائی بجے وزیرا علیٰ کا ہاتھ سے لکھا استعفی موصول ہوا ہے جس پر 11 اکتوبر کی تاریخ درج ہے، استعفے کی جانچ پڑتال اور قانونی تقاضے پورے کرنے کے بعد اس پر باقاعدہ عملدرآمد ہوگا۔

گورنر نے مزیدکہا کہ میری لیگل ٹیم استعفے کا قانونی اور آئینی نکات کے طور پر جائزہ لے گی اور پھر آئینی و قانونی نکات کے مطابق جائزہ لینے کے بعد فیصلہ کیا جائے گا۔

خیال رہے کہ علی امین کے استعفے میں لکھا گیا ہے کہ میں تصدیق کرتا ہوں کہ میں نے بطور وزیراعلیٰ استعفیٰ دیا اور وفاداری کی بنیاد پر استعفیٰ دیا ہے۔