سوموار کو فیصلہ ہو گا ، استعفیٰ منظور ہونے تک علی امین وزیراعلیٰ رہیں گے: گورنر کے پی

گورنر خیبرپختونخوا فیصل کریم کنڈی نے کہا ہے کہ علی امین گنڈاپور کا استعفیٰ موصول ہو چکا ہے، تاہم اس کی منظوری تک وہ بدستور وزیراعلیٰ کے منصب پر فائز رہیں گے۔

اپنے جاری کردہ بیان میں گورنر نے کہا کہ استعفیٰ پیر کے روز دفتر کھلنے کے بعد زیر غور آئے گا اور اسی وقت اس پر باضابطہ فیصلہ کیا جائے گا۔ ان کے مطابق، علی امین کا استعفیٰ ان کے اپنے ہاتھ سے تحریر کردہ ہے، جس کی وصولی کی رسید بھی جاری کی جا چکی ہے۔

گورنر نے مزید کہا کہ استعفیٰ کا قانونی پہلوؤں سے جائزہ لیا جا رہا ہے اور اس حوالے سے قانونی ٹیم مشاورت میں مصروف ہے۔

فیصل کریم کنڈی کا کہنا تھا کہ ان کا ڈی آئی خان میں علی امین گنڈاپور سے ملاقات کا کوئی ارادہ نہیں ہے۔

یاد رہے کہ علی امین گنڈاپور نے وزارت اعلیٰ سے مستعفی ہونے کا اعلان کیا ہے، جب کہ تحریک انصاف کے چیئرمین عمران خان نے ان کی جگہ سہیل آفریدی کو نیا وزیراعلیٰ خیبرپختونخوا نامزد کیا ہے۔