خیبرپختونخوا: نئے وزیراعلیٰ کے انتخاب کے لیے اجلاس 13 اکتوبر کو طلب

پشاور – خیبرپختونخوا میں نئے وزیراعلیٰ کے انتخاب کے لیے صوبائی اسمبلی کا اجلاس پیر، 13 اکتوبر کو طلب کر لیا گیا ہے۔ اجلاس میں قائد ایوان کے انتخاب کا عمل مکمل کیا جائے گا۔

پاکستان تحریک انصاف (پی ٹی آئی) کے سیکریٹری جنرل سلمان اکرم راجا نے اس بات کی تصدیق کی ہے کہ اسمبلی اجلاس مذکورہ تاریخ کو منعقد ہوگا، جس میں پارٹی کے نامزد امیدوار سہیل آفریدی کو وزیراعلیٰ منتخب کرایا جائے گا۔

سلمان اکرم راجا نے سہیل آفریدی کو ایک پرجوش اور اہل نوجوان قرار دیتے ہوئے کہا کہ وہ قبائلی علاقے سے منتخب ہونے والے پہلے وزیراعلیٰ ہوں گے، جو ایک اہم تاریخی سنگ میل ثابت ہوگا۔

یہ سیاسی پیش رفت ایسے وقت میں ہوئی ہے جب علی امین گنڈاپور نے پارٹی چیئرمین عمران خان کی ہدایت پر وزارتِ اعلیٰ سے استعفیٰ دیا، جو باقاعدہ طور پر گورنر خیبرپختونخوا فیصل کریم کنڈی کو موصول ہو چکا ہے۔

دوسری جانب، اپوزیشن جماعتیں بھی ممکنہ طور پر متفقہ امیدوار لانے کے لیے صلاح مشورے میں مصروف ہیں، تاہم تاحال کسی نام کا باضابطہ اعلان سامنے نہیں آیا۔