سرگودھا یونیورسٹی میں ’’ سوشل اینڈ کلچرل چینج تھرو آرٹ اینڈ ڈیزائن‘‘کے عنوان سے سیمینارکا انعقاد

سرگودھا: یونیورسٹی آف سرگودھا میں انسٹی ٹیوٹ آف آرٹ اینڈ ڈیزائن کے زیراہتمام ’’ سوشل اینڈ کلچرل چینج تھرو آرٹ اینڈ ڈیزائن‘‘کے عنوان سے سیمینار منعقد کیا گیا،جس کا مقصد فنونِ لطیفہ کے ذریعے سماجی آگاہی اور ثقافتی ارتقا کے عمل کو اجاگر کرنا تھا۔

وائس چانسلر پروفیسر ڈاکٹر قیصر عباس نے تقریب میں بطور مہمانِ خصوصی شرکت کی۔

اپنے خطاب میں وائس چانسلر نے فن اور ڈیزائن کی اہمیت پر روشنی ڈالتے ہوئے کہا کہ فنون انسانی شعور کو بیدار کرنے، معاشرتی ہم آہنگی کو فروغ دینے اور مثبت سوچ پیدا کرنے میں اہم کردار ادا کرتے ہیں۔ انہوں نے انسٹی ٹیوٹ کی اس کاوش کو سراہا کہ وہ طلبہ اور اساتذہ کو ایسے علمی مباحث میں شامل کر رہا ہے جو فن کو سماجی ترقی سے جوڑتے ہیں۔

سیمینار کے مہمان مقررین میں معروف آرٹ کریٹک اور بیگم نصرت بھٹو نیشنل یونیورسٹی لاہور کے سکول آف ویژول آرٹس اینڈ ڈیزائن کے پروفیسر قدوس مرزا اور پنجاب ہائر ایجوکیشن ڈیپارٹمنٹ سے تعلق رکھنے والی پروفیسر ڈاکٹر کنول خالد شامل تھیں۔

دونوں مقررین نے فنونِ لطیفہ کے سماجی وثقافتی اثرات پر جامع گفتگو کرتے ہوئے اس بات پر زور دیا کہ فن سماجی رویوں کو بدلنے، ثقافتی خلیج کو پاٹنے اور معاشرتی تبدیلی کا مؤثر ذریعہ بن سکتا ہے۔

پروفیسر قدوس مرزا نے اپنے خطاب میں فن اور معاشرے کے باہمی تعلق پر روشنی ڈالی اور بتایا کہ تخلیقی اظہار ہمیشہ سے سماجی روایات کو چیلنج کرنے اور انسانی ہمدردی کو فروغ دینے کا ذریعہ رہا ہے۔

اس موقع پرپروفیسر ڈاکٹر کنول خالد نے بطور فنکار اور ماہرِ تعلیم اپنے تجربات شیئر کیے اور کہا کہ بصری ثقافت سماجی مسائل کے حل اور تنقیدی سوچ کو فروغ دینے میں کلیدی کردار ادا کرتی ہے۔

سیمینار میں طلبہ اور شرکاء کے لیے سوال وجواب کے سیشنز بھی شامل تھے، جن میں انہیں مقررین سے براہِ راست تبادلہ خیال کا موقع ملا۔یہ پروگرام ڈائریکٹر انسٹی ٹیوٹ آف آرٹ اینڈ ڈیزائن مریم سیف کی زیر نگرانی اور لیکچرر مس ہما سجاد کی کوآرڈینیشن میں منعقد کیا گیا۔