مریدکے میں دھرنا ختم، جھڑپوں میں ایس ایچ او شہید، متعدد ہلاکتیں

لاہور: مریدکے میں مذہبی جماعت کے دھرنے کو ختم کروا دیا گیا، تاہم کارروائی کے دوران حالات کشیدہ ہو گئے اور جھڑپوں میں جانی نقصان اور املاک کو شدید نقصان پہنچا۔

ترجمان پنجاب پولیس کے مطابق مظاہرین کو منتشر کرنے کی کوشش پر مذہبی جماعت کے کارکنوں نے پتھراؤ، پیٹرول بموں اور اندھا دھند فائرنگ کا سہارا لیا، جس کے نتیجے میں ایک ایس ایچ او شہید اور 48 اہلکار زخمی ہوئے۔

پولیس کے مطابق صورت حال بگڑنے پر قانون نافذ کرنے والے اداروں کو دفاعی کارروائی کرنا پڑی۔ جھڑپوں میں مذہبی جماعت کے تین کارکن اور ایک راہگیر جان سے گئے، جب کہ آٹھ افراد زخمی ہوئے۔

ترجمان کا کہنا ہے کہ 40 سرکاری اور نجی گاڑیوں کو نذر آتش کیا گیا۔ کئی مظاہرین کو گرفتار کر لیا گیا ہے اور علاقے میں سرچ آپریشن جاری ہے۔