افغان طالبان کی درخواست پر پاکستان کا 48 گھنٹے کے لیے سیز فائر کا اعلان

اسلام آباد: پاکستان نے افغان طالبان کی درخواست پر عارضی جنگ بندی کا فیصلہ کر لیا ہے، جو آج شام 6 بجے سے نافذ العمل ہو چکی ہے اور آئندہ 48 گھنٹوں تک جاری رہے گی۔

وزارت خارجہ کی جانب سے جاری بیان میں کہا گیا ہے کہ افغان طالبان رجیم کی طرف سے جنگ بندی کی باضابطہ درخواست موصول ہوئی، جس پر پاکستان نے علاقائی استحکام اور کشیدگی میں کمی کی خاطر سیز فائر پر آمادگی ظاہر کی ہے۔

ترجمان وزارت خارجہ کے مطابق، پاکستان اس موقع کو دو طرفہ تعمیری مذاکرات کے لیے استعمال کرنا چاہتا ہے تاکہ حالیہ کشیدہ صورتحال کا پائیدار اور پرامن حل تلاش کیا جا سکے۔

ذرائع کے مطابق، پاکستان کی طرف سے نمائندہ خصوصی برائے افغانستان محمد صادق جبکہ افغان جانب سے وزیر خارجہ یا اعلیٰ حکومتی عہدیدار بات چیت میں شریک ہو سکتے ہیں۔

سیز فائر کے آغاز کے ساتھ ہی دونوں جانب سرحدی علاقوں میں صورتِ حال پُرامن ہے، تاہم سیکیورٹی فورسز کو مکمل چوکس رکھا گیا ہے۔