چین نے پاک افغان جنگ بندی کی حمایت کا اظہار کر دیا

چینی وزارت خارجہ نے پاکستان اور افغانستان کے درمیان جاری جنگ بندی کا خیر مقدم کرتے ہوئے کہا ہے کہ بیجنگ خطے میں تعلقات کی بہتری کے لیے مثبت کردار ادا کرنے کے لیے تیار ہے۔ چین نے مشترکہ صبر و تحمل اور مکمل، دیرپا جنگ بندی کی بھرپور حمایت کا اعادہ کیا۔

ادھر اقوام متحدہ کے افغانستان میں امدادی مشن (UNAMA) نے دونوں ممالک سے مطالبہ کیا ہے کہ وہ شہریوں کی سلامتی کو یقینی بنانے کے لیے دشمنی ختم کریں اور پرامن حل کی جانب بڑھیں۔

پاکستان اور افغانستان کے مابین 48 گھنٹوں کی عارضی جنگ بندی پر عمل درآمد جاری ہے، جو امکان ہے کہ کل شام تک برقرار رہے گی۔

یاد رہے کہ گزشتہ روز افغانستان میں طالبان اور خوارج کے ٹھکانوں پر پاکستان کی ہدفی کارروائیوں میں کئی افراد ہلاک ہوئے تھے، جس کے بعد افغان طالبان نے جنگ بندی کی پیشکش کی تھی۔