دنیا کے آلودہ ترین شہروں میں دہلی پہلے جبکہ لاہور دوسرے نمبر پر موجود ہے

دنیا کے آلودہ ترین شہروں کی فہرست میں بھارت کا دارالحکومت دہلی ایک بار پھر پہلے نمبر پر آگیا ہے، جبکہ لاہور دوسرے نمبر پر موجود ہے۔ ماحولیاتی ماہرین کے مطابق دونوں شہروں کی فضا انسانی صحت کے لیے انتہائی خطرناک ہے۔

فضائی آلودگی کے عالمی اشاریے ’ائیر کوالٹی انڈیکس‘ (AQI) کے مطابق لاہور میں آلودگی کی شرح 251 ریکارڈ کی گئی، جو خطرناک حد تک زیادہ ہے۔ محکمہ ماحولیات کے مطابق شہر میں اوسط اے کیو آئی 210 سے 240 کے درمیان رہنے کا امکان ہے۔

ماہرین کا کہنا ہے کہ دہلی کی بڑھتی ہوئی آلودگی کے باعث آج لاہور میں دھند اور اسموگ میں مزید اضافہ متوقع ہے۔ دیوالی کے موقع پر بھارت کے مختلف شہروں میں ہونے والی آتش بازی نے فضا کو مزید آلودہ کردیا ہے، جس کے اثرات سرحد پار یعنی پاکستان کے شہروں، خصوصاً لاہور، میں محسوس کیے جا رہے ہیں۔

بھارت میں دیوالی کے تہوار کے باعث آلودہ ہوائیں پنجاب کے مختلف شہروں میں داخل ہو رہی ہیں جس کے پیش نظر پنجاب میں ایمرجنسی ایکشن پلان فعال کر دیا گیا، ایمرجنسی ایکشن پلان کے تحت صوبے میں دھواں چھوڑنے والی گاڑیوں کے خلاف کریک ڈاؤن بھی جاری ہے، بغیر فٹنس سرٹیفکیٹ چلنے والی گاڑیوں کو فوری بند کیا جائے گا۔

دوسری جانب لاہور میں اسموگ کے ہاٹ اسپاٹس پر اینٹی سموگ گنز کا استعمال جاری ہے تاکہ فضائی آلودگی میں کسی حد تک کمی لائی جا سکے۔ سموگ کنٹرول کرنے والی یہ جدید مشینری فضائی ذرات کو کم کرنے میں مددگار ثابت ہو رہی ہے، جس کے ساتھ ایئر کوالٹی مانیٹرز، ڈرونز کے ذریعے فضائی نگرانی اور پانی کا چھڑکاؤ بھی کیا جا رہا ہے۔ خاص طور پر سردیوں میں فضائی آلودگی کی شدت بڑھ جانے کے باعث یہ اقدامات زیادہ ضروری ہو جاتے ہیں تاکہ شہریوں کی صحت کو بچایا جا سکے۔

اسموگ کے حوالے سے عوامی شعور بیدار کرنے اور حفاظتی اقدامات جیسے ماسک پہننے کی ہدایات بھی جاری کی گئی ہیں، خاص طور پر بچوں، بزرگوں اور سانس کے مریضوں کے لیے یہ انتہائی اہم ہے۔ اس کے ساتھ ہی بعض ماہرین نے مزید سخت حکومتی اقدامات اور توانائی کے صاف متبادل استعمال کی ضرورت پر زور دیا ہے تاکہ طویل المدتی طور پر اسماگ پر قابو پایا جا سکے۔ ایسے اقدامات کی مدد سے لاہور کو دنیا کے بدترین آلودہ شہروں میں کمی کی جانب لے جانے کی کوشش کی جارہی ہے۔

یہ تمام اقدامات پنجاب حکومت کے جدید اسموگ مینجمنٹ پلان اور گرینڈ آپریشن کا حصہ ہیں جن کا مقصد فضائی معیار کو بہتر بنانا اور شہریوں کی صحت کے تحفظ کو یقینی بنانا ہے.