انتخابات آزاد ، منصفانہ اور شفاف طریقے سےمنعقد ہوئے : چیف الیکشن کمشنرآزاد کشمیر

تفصیلات کے مطابق بھیمبیر میرپور اور کوٹلی سمیت آزاد جموں و کشمیر کے مختلف مقامات کے پولنگ اسٹیشنوں کا دورہ کرنے کے بعد صحافیوں سے گفتگو کرتے ہوئے انہوں نے کہا کہ پولنگ پرامن ماحول میں جاری رہی اور ووٹرز نے بھرپور انداز میں پولنگ کے عمل میں حصہ لیا۔  اان کاکہناتھا کہ انتخابی عمل مکمل ہونے کے بعد پریذائڈنگ افسران موقع پر ہی نتائج کا اعلان کریں گے اور انتخابی نتائج کی کاپی پولنگ ایجنٹوں کو فراہم کی جائے گی۔

جسٹس سلہریا نےانتخابی عمل کو پرامن تکمیل کرنے کے لئے میڈیا کے کردار کو سراہا ، اس موقع پر الیکشن کمیشن کے ممبران راجہ فاروق نیاز اور فرحت علی میر اور ڈائریکٹر جنرل انفارمیشن راجہ اظہر اقبال بھی موجود تھے۔

واضح رہے کہ آزاد جموں کشمیر کی قانون ساز اسمبلی کے انتخابات کے سلسلے میں ووٹنگ  ختم ہوگئی جبکہ ووٹوں کی گنتی جاری ہے ۔  32 لاکھ 20 ہزار سے زائد ووٹرز حق رائے دہی استعمال کریں گے۔ بارہ سو انتیس پولنگ  سٹیشنز  کو حساس قرار دیا گیا ہے۔ آزاد کشمیر  حکومت نے غیر متعلقہ افراد کے داخلے  پر پابندی عائد کرتے ہوئے24 سے 26 جولائی تک   دفعہ 144 نافذ کر دی  ہے۔