مغربی کنارے پر اسرائیلی قبضہ عالمی قوانین اور اقوام متحدہ کی قراردادوں کی سنگین خلاف ورزی ہے،دفتر خارجہ

اسلام آباد:پاکستان نے مقبوضہ مغربی کنارے کے حصوں پر اسرائیل کی جانب سے قبضہ کی کوششوں کی شدید مذمت کی ہے۔

تفصیلات کے مطابق ترجمان دفترِ خارجہ کی جانب سےجاری ایک بیان میں کہا گیا ہے کہ اسرائیل کی قانون ساز اسمبلی میں پیش کیے گئے مجوزہ بل کے ذریعے غیر قانونی یہودی بستیوں سمیت مقبوضہ فلسطینی علاقوں کو اسرائیلی دائرہ اختیار میں لانے کی کوشش کی جا رہی ہے، جو بین الاقوامی قانون، اقوام متحدہ کی سلامتی کونسل کی قراردادوں اور فلسطینی عوام کے ناقابلِ تنسیخ حقوق کی صریح خلاف ورزی ہے۔

بیان میں ترجمان نے کہا کہ ایسے اشتعال انگیز اور غیر قانونی اقدامات خطے میں امن و استحکام کی کوششوں کو کمزور کر رہے ہیں،پاکستان نے عالمی برادری سے مطالبہ کیا کہ وہ فوری اور مؤثر اقدام اٹھائے تاکہ اسرائیل کو ان غیر قانونی اقدامات سے روکا جا سکے اور بین الاقوامی قوانین کی مسلسل خلاف ورزیوں پر قابو پایا جا سکے۔

🔊PR No.3️⃣1️⃣3️⃣/2️⃣0️⃣2️⃣5️⃣

Pakistan Strongly Condemns Israeli Moves Undermining Palestinian Sovereignty https://t.co/xUzE3GlRGM pic.twitter.com/ySISpzT8CA

— Ministry of Foreign Affairs - Pakistan (@ForeignOfficePk) October 23, 2025

دفتر خارجہ کی جانب سے جاری بیان میں مزیدکہا گیا کہ پاکستان فلسطینی عوام کے حقوق، بالخصوص حقِ خودارادیت کے تحفظ کے لیے علاقائی و عالمی شراکت داروں کے ساتھ تعاون جاری رکھے گا، تاکہ فلسطینیوں کے لیے امن، انصاف اور وقار کو یقینی بنایا جا سکے۔

ترجمان نے کہا کہ پاکستان ایک مرتبہ پھر ایک آزاد، خودمختار، قابلِ عمل اور جغرافیائی طور پر متحد فلسطینی ریاست کے قیام کی حمایت کرتا ہے، جو 1967ء سے قبل کی سرحدوں پر مبنی ہو اور جس کا دارالحکومت القدس الشریف ہو۔

خیال رہے کہ گزشتہ روز پاکستان نے غزہ میں امن معاہدے کی اسرائیلی خلاف ورزیوں کی سخت مذمت کرتے ہوئے کہا تھا کہ پاکستان اسرائیلی قابض افواج کے تازہ حملوں کی پرزور مخالفت کرتا ہے جن کے نتیجے میں بے شمار بے گناہ فلسطینی شہری شہید ہوئے۔

ترجمان دفتر خارجہ کا کہنا تھا کہ یہ کارروائیاں شرم الشیخ میں مسلم و عرب ممالک، امریکہ، یورپ اوراقوام متحدہ کی قیادت کی موجودگی میں ہونے والے امن معاہدے کے منافی ہیں۔