ڈونلڈ ٹرمپ کا اعلان: 2028 کے امریکی انتخابات میں نائب صدر کے طور پر حصہ نہیں لوں گا

امریکی سابق صدر ڈونلڈ ٹرمپ نے واضح کیا ہے کہ وہ 2028 کے امریکی انتخابات میں نائب صدر کے امیدوار کے طور پر حصہ نہیں لیں گے۔

ٹرمپ کے حامیوں کی جانب سے یہ تجویز سامنے آئی تھی کہ وہ نائب صدر کے طور پر الیکشن میں حصہ لے کر ایک اضافی مدت کے لیے صدارت حاصل کرنے کی راہ ہموار کر سکتے ہیں۔

غیر ملکی خبر رساں ادارے رائٹرز کے مطابق، ٹرمپ نے طیارے ایئر فورس ون میں صحافیوں سے گفتگو کرتے ہوئے کہا“مجھے اس کی اجازت ہوگی، لیکن میں ایسا نہیں کروں گا۔ میرے خیال میں یہ ایک چال ہوگی، اور عوام کو یہ پسند نہیں آئے گا۔ یہ درست طریقہ نہیں ہوگا۔”

یہ بیان ان اشاروں کے بعد سامنے آیا ہے جو ٹرمپ نے حالیہ عوامی تقاریر میں دیے تھے۔ اطلاعات کے مطابق وائٹ ہاؤس میں “Trump 2028” کے نعرے والے کیپس بھی دیکھی گئی ہیں۔

امریکی آئین کی 22ویں ترمیم کے مطابق، کوئی بھی شخص تیسری بار صدر منتخب نہیں ہو سکتا۔
کچھ مبصرین نے خیال ظاہر کیا ہے کہ اگر ٹرمپ نائب صدر کے طور پر منتخب ہوں اور صدر بعد میں استعفیٰ دے دیں تو وہ دوبارہ صدارت حاصل کر سکتے ہیں، تاہم قانونی ماہرین کے مطابق یہ آئینی طور پر ممکن نہیں۔

ٹرمپ نے مزید کہا“میں ایسا کرنا پسند کروں گا، میرے پاس اب تک کے بہترین اعداد و شمار ہیں۔”

جب ایک صحافی نے ان سے پوچھا کہ کیا وہ تیسری مدت کے امکان کو مکمل طور پر مسترد کر رہے ہیں، تو ٹرمپ نے قدرے مبہم انداز میں جواب دیا “کیا میں اسے مسترد کر رہا ہوں؟ میرا مطلب ہے، یہ تو آپ کو بتانا ہوگا۔”

نائب صدر جے ڈی وینس اور وزیرِ خارجہ مارکو روبیو کا ذکر کرتے ہوئے ٹرمپ نے کہا کہ یہ دونوں “بہترین افراد ہیں، اور اگر وہ ایک ٹیم بنائیں تو وہ ناقابلِ شکست ہوں گے۔”