26 ویں ترمیم کی کوئی بھی بات 27ویں ترمیم میں شامل ہوئی تو قابل قبول نہیں،مولانا فضل الرحمان

اسلام آباد: سربراہ جے یو آئی (ف)مولانا فضل الرحمان نے واضح کیا ہے کہ اگر26و یں ترمیم کی کوئی بھی بات 27ویں ترمیم میں شامل ہوئی تو قابل قبول نہیںہو گا۔

تفصیلات کے مطابق جے یو آئی (ف)کی پارلیمانی پارٹی  کے اجلاس کے بعد میڈیا سے گفتگو کرتے ہوئے انہوں نے کہا کہ پارلیمانی پارٹی اجلاس میں27ویں ترمیم سےمتعلق تبادلہ خیال کیاگیا۔

میڈیا سے گفتگو کرتے ہوئے ان کا کہنا تھا کہ 27ویں ترمیم سے متعلق کوئی مسودہ حکومت کی طرف سے سامنے نہیں آیا،مسودہ سامنے آنے کے بعد ہی کوئی حتمی فیصلہ کیاجاسکتاہے،26ویں ترمیم کی کوئی بھی بات 27ویں ترمیم میں شامل ہوئی تو قابل قبول نہیں۔

سربراہ جے یو آئی نے مزید کہا کہ حکومت26ویں ترمیم میں35شقوں سے دستبردار ہوئی تھی،جے یو آئی چاہتی ہے کہ صوبے پہلے سے بھی زیادہ مضبوط ہوں،صوبوں کے حقوق میں اضافہ ہوناچاہیے،ان کا کہنا تھا کہ اگر صوبوں کے حقوق پر ڈاکا ڈالا گیا تو بھرپور مزاحمت کریں گے۔

انہوں نے مزید کہا کہ سود کے خاتمے سےمتعلق فی الحال کوئی پیشرفت نظر نہیں آرہی ،مدارس کی رجسٹریشن بھی نہیں کی جارہی ہے،ملک کے تمام بچے ہمارے اپنے ہیں،کسی کو الگ نظر سے نہیں دیکھتے،چاہتےہیں27ویں ترمیم پر تمام اسٹیک ہولڈرز کو اعتماد میں لیاجائے۔

پاک افغان کشیدگی کے حوالے بات کرتے ہوئے مولانا فضل الرحمان کا کہنا تھا کہ پاکستان اور افغانستان پڑوسی مسلم ملک ہیں ،چاہتے ہیں معاملات افہام و تفہیم سے حل ہوں،انہوںنے مزید کہا کہ صدر مملکت یا بلاول بھٹو سے ملاقات فی الحال شیڈول میں نہیں۔