پاک بحریہ کے جہاز’پی این ایس سیف ‘کا بیرون ملک تعیناتی کے دوران مالدیپ کا دورہ

راولپنڈی:پاک بحریہ کے جہاز’’ پی این ایس سیف ‘‘نے بیرون ملک تعیناتی کے دوران مالدیپ کی بندرگاہ مالے کا دورہ کیا،جہاں بندرگاہ پہنچنے پر پاک بحریہ کے جہاز کا مالدیپ کے حکام نے پرتپاک استقبال کیا۔

پاک فوج کے شعبہ تعلقات عامہ( آئی ایس پی آر) کے مطابق دورے کے دوران مشن کمانڈر کموڈور محمد ذیشان نبی شیخ نے چیف آف ڈیفنس فورس میجر جنرل ابراہیم ہلمی، کمانڈنٹ کوسٹ گارڈ میجر جنرل محمد سلیم اور پاکستان کے ہائی کمشنر وائس ایڈمرل (ر) فیصل رسول لودھی سے علیٰحدہ علیٰحدہ ملاقاتیں کیں۔

ترجمان پاک فوج کے مطابق ان ملاقاتوں میں باہمی دلچسپی کے امور، بحری تعاون، اور میری ٹائم سکیورٹی سے متعلق امور پر تبادلہ خیال کیا گیا، مشن کمانڈر نے اس موقع پر چیف آف دی نیول سٹاف ایڈمرل نوید اشرف کی جانب سے مالدیپ کے عوام کے لیے نیک خواہشات کا پیغام بھی پہنچایا۔

ترجمان آئی ایس پی آر نے مزید بتایا کہ مالدیپ میں قیام کے دوران میزبان ملک کے سرکاری حکام، مختلف ممالک کے سفیروں اور پاکستانی کمیونٹی کے ارکان نے جہاز کا دورہ کیا، جہاز کو عوام کے لیے بھی کھولا گیا جس سے دونوں ممالک کے عوامی تعلقات کو مزید تقویت ملی۔

ترجمان کے مطابق دورے کے اختتام پر پی این ایس سیف نے مالدیپ کوسٹ گارڈ کے جہازوں کے ساتھ مشترکہ بحری مشق میں حصہ لیا،اس مشق کا مقصد دفاعی تعاون میں اضافہ اور دونوں بحری افواج کے درمیان آپریشنل ہم آہنگی کو فروغ دینا تھا۔

ترجمان پاک فوج کا مزید کہنا تھا کہ مالدیپ میں پاک بحریہ کے جہازوں کے باقاعدہ دورے دوطرفہ تعلقات کی مضبوطی کی علامت ہیں اور یہ سلسلہ مستقبل میں باہمی تعاون اور خطے میں میری ٹائم سکیورٹی کے فروغ کا باعث بنے گا۔